Як манбаъ ба “Аздо тв” хабар дод, ки Домулло Абдулҳақ ягона нафари боздоштшуда пас аз маросими дафни Домулло Ҳикматуллоҳ набуда, чанд рӯҳонии дигарро низ дар зимн боздошт кардаанд.
Ба қавли манбаи дигар, як хатиби дигареро, ки исмашро набурдаанд ва аз шогирдони Домулло Муҳаммадии қумсангирӣ буда аст, низ боздошт шудааст. Манбаъ мегӯяд, суханони ин рӯҳонён, ки Домулло Ҳикматуллоҳро пешво гуфтаанд, ба амниятиҳо писанд наомадааст. Дар ҳамин ҳол ӯ мегуяд, ғайр аз инҳо низ иддае аз рӯҳониёнро пас аз он маросими ҷаноза боздошт кардаанд, ки ададшон аз 10 нафар бештар аст.
Дирӯз сомонаи “Бомдод”, аз боздошти Домулло Абдулҳақ, сархатиби масҷиди марказии ноҳияи Шоҳмансури шаҳри Душанбе хабар дода буд. Гуфта мешавад, сархатиб шоми 19 апрел аз ҷониби кормандони шуъбаи Кумитаи давлатии амнияти миллӣ дар ноҳияи Фирдавсии пойтахт боздошт шудааст.
“Бомдод” аз қавли манбеаш дар мақомоти амниятӣ хабар дод, ки сабаби боздошти домулло ба мавъизаи дар маросими дафни Домулло Ҳикматуллоҳи Тоҷикободӣ кардааш рабт дорад. Домулло Абдулақ дар он маъиза Домулло Ҳикмаутуллоҳро аз пешвоҳои “бузурги мо” гуфтааст. Ӯ ҳамамзон гуфта, ки пас аз марги чунин олимҳо мардум дигар пешвоёни ҷоҳил ва нодонро барои худ пешво мегиранд”.
Мақомоти амниятӣ дар ин муқоиса гӯё ишораҳо ба президенти кунунии Тоҷикистон Эмомалӣ Раҳмонро дидаанд, ки соли 2016 бо қабули як қонуни вижа “Пешвои миллат” эълон шуд.
Абдулҳақ Обидов 44 сол дошта, 4 соли ахир сархатиби масҷиди ҷомеи марказии ноҳияи Шоҳмансурро бар уҳда доштааст. Бо иттилои “Ховар” аз қавли дафтари матбуоти Кумитаи давлатии амнияти миллии Тоҷикистон, Абдулҳақ Обидов ба узвият дар ҳаракати мамнӯи “Салафия” муттаҳам шуда аст.
Бояд гуфт, ки ин ҳам дар ҳолест, ки аз чанд соли ахир дар Тоҷикистон имомхатибон дар мувофиқа бо мақомот таъйин мешаванд ва аз санҷиш гузашта ҳамзамон аз давлат маош мегиранд. Бештари онҳо дар пуштибонӣ аз ҳукумат ва танқиди мухолифон суханронӣ мекунанд.
Озодӣ навишта, ки ҳамроҳ бо ӯ 4 сокини шаҳри Ваҳдат ва ноҳияи Рӯдакӣ низ боздошт шудаанд ва бар зидди ҳамаи онҳо онҳо парвандаи ҷиноӣ боз шудааст.
Дар Тоҷикистон пас аз манъи ҲНИТ боздошту зиндони кардани гурӯҳҳои дигари динӣ шуруъ шуд ва то ҳол ҷараён дорад. Дар соли гузашта садҳо нафарро бо иттиҳоми пайравӣ аз “Ихвон-ул-муслимин” (Бародарони мусалмон) боздошт ва ба солҳои тӯлонӣ зиндонӣ кардаанд. Ҳамзомон қисме аз фориғтаҳсилоне, ки дар донишгоҳҳои Эрон таҳсил кардаанд боздошту зиндонӣ шуданд. Дар гузашта ҳамчунин мақомоти Тоҷикистон даҳҳо нафарро бо иттиҳоми пайравӣ аз ҷамоъати “Таблиғ” ва ҳаракати “Салафия” бозодошту зиндон кардаанд.
