Рӯзи 25-уми апрели соли 2023 Гусейн Гасанов, яке аз блогерони шинохтаи русзабон бо даъвати Исмоили Маҳмадзоҳир, набераи раисҷумҳури Тоҷикистон Эмомалӣ Раҳмон ба Тоҷикистон омад.
Наворе дар шабакаҳои иҷтимоӣ аз ҷараёни пешвозгирии ин блогери русзабон аз ҷониби набераи Эмомалӣ Раҳмон нашр шудааст, ки дар байни корбарони тоҷик вокунишҳои зиёдеро ба бор овардааст.
Дар он навор дида мешавад барои пешвози Гусейн Гасанов набераи раисҷумҳур ва раиси федератсияи ҷудои кишвар Исмоили Маҳмадзоҳир то назди пиллаи ҳавопаймо рафта бо тантана аз ӯ истиқбол мекунад. Ҳатто дида мешавад, ба хотири меҳмоннавозӣ ба пешвози Гасанов духтари тоҷике бо нону ширинӣ мебарояд.
Корвони мошинҳое, ки блогери рус ва набераи раисҷумҳурро мебурд, аз 4 адад мошини навъи “CADILLAC” ва як адад “Bentley”, ки ҳар кадом беш аз 150 ҳазор доллари амрикоӣ арзиш доранд ва рақамҳои давлатии “1111” доштанд, иборат буд. Гуфта мешавад, аксар рақамҳои давлатии “1111” аз Исмоили Маҳмадзоҳир мебошад.
Ба ҷуз ин мошинҳо, онҳоро ҳамчунин мошинҳои пулис ва муҳофизон ҳамроҳӣ мекарданд ва баъзе роҳҳои шаҳр баста буданд. Оддатан роҳҳои шаҳр замоне баста мешаванд, ки меҳмони олиқадре, ба монанди президентҳои кишварҳои дигар ташриф биёранд ва ё худи Эмомалӣ Раҳмон аз он ҷо убур кунад.
Гусейн Гасанов дар яке аз наворҳояш мегӯяд, ки ӯро дар хонае ҷой кардаанд, ки беш аз 600 метри квадратӣ масоҳат дорад. Инчунин ин блогер чанд аксу навор аз мизи пур аз нушу неъват, хона ва мошинҳои бо ҳашаматро дар саҳфаи инстаграмаш гузоштааст.
Маълум нест ин блогери рус чанд рӯз дар Тоҷикистон боқӣ хоҳад монд, вале бо мухлисони тоҷикистонияш рӯзи 29-уми апрел дар майдони “Истиқлол” вохӯрӣ дорад.
Гусейн Гасанов блогери озаритабор буда, дар Русия ба дунё омадааст. Ӯ яке блогерони шинохтаи русзабон ба шумор меравад ва дар саҳфаи инстаграмаш 26,1 миллион дунболкунанда дорад. Ӯ бо наворҳояш ва баргузор намудани лотореяҳо бештар миёни мардум шинохта шудааст. Дар охирин лотореяе, ки дар Инстаграм доир карда буд, ҷоизаи асосӣ – мошини гаронбаҳои тамғаи “Ламборҷини Урус” бо арзиши 30 миллион рублро як корбари ҷавони 18-сола аз Тоҷикистон бо номи Умедҷон соҳиб шуда буд.
Пешвози ин блогери русзабон, ки гуфта мешавад, маҳз бо даъвати Исмоили Маҳмадзоҳир писари духтарбузурги Эмомалӣ Раҳмон, Фирӯзаи Раҳмон ба Тоҷикистон омадааст, дар шабакаҳои иҷтимоӣ баҳсҳои зиёдеро ба бор овардааст. Корбарон мепурсанд, ки ин нафар чӣ кореро анҷом додааст, ки дар сатҳи президенти як кишвар пешвоз гирифта мешаваду барои пешвозаш духтуари тоҷик бо нону ширинӣ мебарояд ва ҳатто роҳҳои пойтахт баста мешаванд?
Ин набераи Эмомалӣ Раҳмон чанде пеш раиси федератсияи ҷудои кишвар таъйин шуда буд. Ӯ дӯстдори мошинҳо ва аспҳову либосҳои гаронбаҳост. Падари ӯ Маҳмадзоҳир Соҳибов амаки домоди дигари Президент Шамсулло Соҳибов аст.
Оилаи Соҳибовҳо аксар тиҷоратҳоро дар кишвар инҳисор кардаанд ва аз имтиёзҳои зиёде дар кишвар бархӯрдоранд. Ширкати “Фароз”, ки қариб тамоми навъи тиҷорати кишварро дар қабзаи худ гирифтааст, мутаалллиқ ба Шамсулло Соҳибов мебошад. Аксари тиҷоратҳои бузурги Соҳибовҳо қариб аз тамоми анвои андоз озоданд.
