Ҷон Кирби, сухангӯи Вазорати дифои Амрико мегӯяд, чархболҳои низомии Афғонистон, ки тавассути нерӯҳои ҳавоии ҳукумати Ашраф Ғанӣ ба Тоҷикистону Узбекистон бурда шудаанд, ба Толибон бозгардонда намешаванд.
Сухангӯи Вазорати дифои Амрико дар посух ба суоли як хабарнигори амрикоӣ дар бораи сарнавишти чархболҳои артиши Афғонистон, ки рӯзи 15 август аз Афғонистон ба Тоҷикистон ва Узбекистон парвоз карданд, гуфт, ки “Ман фикр мекунам ки чархболҳои артиши Афғонистон, ки дар Тоҷикистон ва Узбакистон қарор доранд, ба Толибон бозгардонида намешаванд”.
15 августи соли 2021 рӯзе, ки президенти собиқи Афғонистон Ашраф Ғанӣ Аҳмадзай аз Афғонистон фирор кард ва Кобул ба дасти Толибон суқут кард, наздики 60 ҳавопаймои ҷангӣ ва чархболҳои артиши Афғонистон ҳамроҳи халабонон ба Тоҷикистон ва Узбакистон парвоз карданд ва дар фурӯдгоҳи Термизи Узбекистон ва Бохтари Тоҷикистон фурӯд омаданд.
Сухангӯи Пентагон мегӯяд, ки “мо барои ҷобаҷой кардани он чархболоҳо кор кардаистодаем ва ҳоло ман маълумоти наве дар бораи ҷобаҷои онҳо надорам. Аммо фикр мекунам, ки ин чархболҳо ба Толибон таҳвил дода нахоҳанд шуд ва дар бораи ба кӣ додани онҳо ва наҳваи ҷобаҷоӣ ва истифодаи онҳо тасмимгириҳо ҷараён дорад”.
Рӯзи 12 январи соли ҷорӣ Муло Муҳаммад Яқуб, сарпарасти Вазорати дифои Толибон дар маросими эҳёи фаъолияти чархболҳои нерӯи ҳавои Афғонистон бори дигар аз Тоҷикистон ва Узбекистон хост, ки чархболҳои Афғонистонро бозгардонанд ва сабри онҳоро имтиҳон накунанд.
Ӯ гуфта буд: “Мо эҳтиромона дархост мекунем, ки чархболҳо ва ҳавопаймоҳои низомиеро, ки халабонон бо онҳо фарор карданд, бозгардонед. Сабри моро имтиҳон накнуед, сабри мо дар ҳоли лабрез шудан аст”.
Бар асоси маъулумоти сомонаи Avia.pro, беш аз 60 ҳавопаймои низомӣ Афғонистон 15 август ба хориҷ аз Афғонистон интиқол дода шудаанд. Халабонони собиқи Нерӯҳои ҳавоии Афғонистон дастикам 26 чархбол ва 35 ҳавопайморо ба Тоҷикистон ва Узбекистон интиқол даданд.
Ҳавопаймоҳо ва чархболҳои артиши Афғонистон, ки ба кишварҳои ҳамсояҳои шимолии парвоз кардаанд, иборатанд аз 19 чархболи Ми-17, 7 чархболи UH-60, 7 ҳавопаймои ҳамлаи А-29 Тукано, 17 ҳавопаймои тезрави Cessna 209B ва 11 ҳавопаймои Pilatus-12NG. Ин чархболҳо ва ҳавопаймоҳои артиши Афғонистон боиси таниш байни Толибон ва Тоҷикистону Узбакистон гаштааст. Толибон талаб дорад, ки ин ҳавопаймоҳо ба Афғонистон баргардонида шаванд.
Аз замони даъвои Толибон бар сари ин ҳавопаймоҳо ин бори авал аст, ки Вазорати дифои Амрико дар ин бора изҳори назар мекунад.
