Ҳиндустон сигнали мошинҳоро аз садои оддии гушхарош ба оҳангҳои миллии ин кишвар иваз карданист.
Бино ба иттилои хабаргузории ҳиндии “The Times of India”, вазири ҳамлу нақли ин кишвар тасмим дорад қонунеро барои қабул ба парлумони ин кишвар ироа кунад, ки тибқи он мехоҳад садоҳои гӯшхароши худравҳоро дар хиёбонҳои пуриздиҳом ба навоҳои мусиқии миллии Ҳиндустон иваз кунад.
Вазири ҳамлу нақли Ҳиндустон Нитин Годкори ва ҳамзамон намояндаи парлумони ин кишвар рӯзи сешанбе ба хабарнигорон гуфт: “Ман ин тарҳро меомӯзам ва ба зудӣ раванди ҳуқуқии онро пайгирӣ хоҳам кард. Аз ин ба баъд, мо мехоҳем, ки сигнолҳои ҳама худравҳо ба садои мусиқии миллии Ҳиндустон шабоҳат дошта бошанд, то ин барои мардум форамтар бошад.”
Ин мақоми ҳиндӣ афзуда, ки тарҳи ӯ барои худравҳои ёрии таъҷилӣ, пулис ва дигар мошинҳои давлатӣ низ дар назар гирифта шудааст.
Ҳиндустон яке аз кишварҳоест, ки аз лиҳози таҷаммуъи аҳолӣ ва ҳаракати зиёди васоили нақлиёт дар шаҳрҳояш, яке аз пурғавғотарин шаҳрҳои ҷаҳон ба шумор мераванд. Автобусҳо, мошинҳои боркаш, таксиҳо, мотосиклҳо, мошинҳои хусусӣ, мошинҳои боркаш ё сечархаҳо дар кӯчаҳо бидуни ҳеч риояи қоидаи роҳ фақат бо сигнол додан мегарданд.
