Игор Лякин-Фролов Сафири Русия дар Тоҷикистон дар мулоқот ба намояндагони расонаҳои хабарӣ иброз доштааст, ки Пойгоҳи низомии 201-и Русия, ки дар Тоҷикистон мустақар аст, ба ҳамагуна “сюрпризҳо” -и ҷангҷӯёни афғон омода аст.
Бино ба иттилои “Sputnik” сафир гуфтааст, ки аз ҷиҳати силоҳ ва таълимоти ҷангӣ хизматчиёни ҳарбии Русия дар сатҳи хеле баланд қарор доранд.
Ба гуфтаи Игор Лякин “Муҳимтар аз ҳама он аст, ки онҳое, ки дар қаламрави Афғонистон ҳастанд, инро медонанд. Он нерӯҳое, ки ба амнияти Тоҷикистон зарар мерасонанд ва метавонанд зарар расонанд. Аз ин рӯ, пеш аз коре, ки бояд кунанд, бояд хеле хуб фикр кунанд”.
Дар идома иброз доштааст, ки масъалаҳои ҳифзи марзи Тоҷикистону Афғонистон ва Осиёи Марказӣ дар нишасти ахири СААД баррасӣ шуд.
Ӯ ҳамчунин аз вазъи номусоиди Афғонистон изҳори нигаронӣ намуда, иброз доштааст, ки “вазъ дар Афғонистон номусоид аст. Музокирот идома дорад, аммо то ба ҳол онҳо натиҷаи мушаххас надодаанд. Амалиёти низомӣ дар кишвар идома дорад”.
Айни замон дар Тоҷикистон барномаи навсозии Қувваҳои Мусаллаҳи Тоҷикистон амалӣ карда мешавад. “Таҳвилҳо дар солҳои охир 12 миллиард рублро ташкил медиҳанд. Дар назар аст, ин ҳафта ва ё ҳафтаи оянда таҷҳизоти муҳандисӣ ворид карда шавад”, – мегӯяд, Игор Лякин.
Гуфта мешавад, ки дар омода кардани кадрҳои низомӣ Русия низ кумакашро ба низомиҳои тоҷикистонӣ мерасонад. Ба гуфтаи сафир, ҳамасола тақрибан ҳазор фармондеҳи сатҳи миёна дар пойгоҳи 201 таълими гуногуни низомӣ мегиранд.
