Саидмукаррам Абдулқодирзода, муфитии кишвар ва раиси Шӯрои уламои Маркази исломии Тоҷикистон мегӯяд, ҷашни Сада ба ақидаи мусалмон зиддият надорад.
Дар ин бора Абдулқодирзода рӯзи 31-уми январ зимни нишасти матбуотии Кумитаи дин, танзими анъана ва ҷашну маросими Тоҷикистон ба суоли хабарнигорон посух дод.
Ин ҳам дар ҳолест, аксар коршиносони масоили динӣ ҷашни Садаро, ки оташ равшан кардану гирди он ниёйиш кардан аз маросими аслии он ба шумор меравад, мухолифи эътиқоди исломӣ дониста, ҷашн гирифтани онро дуруст намешуморанд.
Абдулқодирзода дар посух ба ин суол инчунин таъкид кард, ки ислом дар мавриди ҷашнҳои фарҳангӣ ва миллии миллатҳо мегӯяд: “Кадом ҷашне, ки ба ақидаи мусалмон, ибодати мусалмон ва ба шахсияти мусалмон зарар нарасонад, ҷашн гирифтани он мушкиле надорад.” Ӯ аз мазҳаби Ҳанафӣ мисол оварда гуфт, ки “Ҳар урфу анъанае, ки муқобил ба ислом нест, он иҷозат аст.”
Аммо муфтӣ дар мавриди ҷашни Сада, ки имрӯзҳо дар Тоҷикистон ҷашн гирифта мешавад, ба ақидаи исломӣ муғойрат дорад ё на, аз посухи равшан худдорӣ кард, вале ин гуна ҷашнҳоро ҷашнҳои миллӣ хонд ва гуфт, барпо кардани ҷашнҳои миллӣ зарар надорад.
Аммо рӯзи душанбе, 3-юми феврал дар суҳбат бо Azda TV як коршиносони масоили динӣ, ки нахост номаш зикр шавад, гуфт, ҷашни Сада агарчи аз ҷашнҳои қадимии миллати форсу тоҷик ба ҳисоб меравад, вале аз нигоҳи динӣ мухолифи ақидаи исломӣ аст. Ӯ барои исбот ба иддаояш гуфт: “Дар ин ҷашн оташ аз як сӯ мазҳари қувват ва нерӯи ҷудо аз Худо аст ва аз сӯи дигар аз Худо ҳам ҷудо нест, ки маҳз ингуна боварҳо мухолифи ақидаи исломиянд.”
Инчунин дар ин нишасти матбуотӣ Сулаймон Давлатзода, раиси Кумитаи дин, танзими анъана ва ҷашну маросими Тоҷикистон аз ошкор посух додан худдорӣ кард.
Хабарнигори Радиои Озодӣ дар ин нишаст аз Давлатзода пурсид, омори як сол пеши Эмомалӣ Раҳмон дар мавриди гаравидани 4500 ҷавони тоҷик ба гурӯҳҳои ифротӣ боис шуд, ки расонаҳои байналмилалӣ Тоҷикистонро кишвари дорои сатҳи баланди ифротгароӣ арзёбӣ кунанд, таҳлилҳо ва ташхиси Кумитаи дин чӣ гуна аст, оё дар Тоҷикистон воқеан рӯҳияи ифротгароӣ зиёд аст ё ин омор ягон ангезаи дигар дорад?
Давлатзода дар посух ба ин суол гуфт, ки “Шумо ҳамаатон огоҳ ҳастед, ки беш аз 2 ҳазор шаҳрвандони мо дар сафҳои ДИИШ буданд, ин як чизи исботшуда аст. Ва дар баробари ин ҳолатҳое ҳаст, ки ҷавонон аз нафаҳмидан ё ин ки фирефта шудан ба гурӯҳҳои экстремисӣ мепайванданд ва ин то ҳол идома дорад.” Ӯ бо таъкид гуфт, “он чизҳое, ки дар суханони президенти кишвар дарҷ гардида буданд, воқеият дорад.”
Раиси Кумитаи дини кишвар ба ҷуз таъйиди суханҳои раисҷумҳур мисли Абдулқодирзода аз посухи рӯшан худдорӣ кард ва нагуфт, ки таҳлилҳои худи Кумитаи дин дар ин маврид чӣ аст ва оё сатҳи ифротгароӣ дар кишвар дар ҳақиқат рӯ ба афзоиш аст?
