Президенти Қазоқистон бо даъвати Президент Эмомалӣ Раҳмон ба Тоҷикистон сафар мекунад.
Бино ба иттилои расмӣ, имрӯз, 19-уми августи соли 2024 Вазорати корҳои хориҷии Тоҷикистон хабар дод, ки Президенти Қазоқистон бо сафари давлатӣ ба шаҳри Душанбе, пойтахти кишварамон меояд.
Ба қавли манбаъ, қарор аст, Қосим-Жомарт Тоқаев Президенти Қазоқистон рӯзи 22-уми моҳи ҷорӣ дар раъси як ҳайати воломақоми кишвараш вориди Тоҷикистон шавад. Сафари давлатии Президенти Қазоқистон 23-юми августи соли ҷорӣ дар Тоҷикитсон ба поён мерасад.
Инчунин дар рафти ин сафар Президенти Қазоқистон бо раиси Маҷлиси намояндагон ва Сарвазири кишвар ҳам мулоқот хоҳад кард ва сипас маҷмӯе аз санадҳои расмӣ низ, аз ҷумла “Шартнома оид ба муносибатҳои иттифоқӣ” байни ду кишвар ба имзо хоҳад расид.
Ҳамзамон бо ин, дар давоми ин ду рӯз “музокироти сатҳи олии Тоҷикистону Қазоқистон дар шакли маҳдуд ва васеъ бо шумули ҳайатҳои ҳукуматӣ сурат хоҳад гирифт.” Нишастҳои дигари дуҷониба дар сатҳҳои мухталиф низ ба нақша гирифта шудааст.
Гуфта мешавад, бар асоси арзёбиҳои бархе созмонҳои минтақавӣ ва ҷаҳонии ҳомии ҳуқуқи башар, низомҳои ҳоким дар Тоҷикистон ва Қазоқистон худкома буда, онҳо муштаркоти сиёсие зиёде бо ҳам доранд. Ҳукуматдорони ҳар ду кишвар дар саркӯб кардани мухолифони худ ва маҳдуд кардани озодиҳои шаҳрвандӣ низ муттаҳам мешаванд.
