Эмомалӣ Раҳмон, раисҷумҳури Тоҷикистон бо имзои як фармон домодаш Ҷамолиддин Нуралиевро аз вазифаи муовини раиси Бонки миллӣ барканор кард.
Бино ба иттилои сомонаи расмии Президент ин фармон рӯзи 10-уми июни соли ҷорӣ ба имзо расида, дар он гуфта мешавад, ки “Нуралиев Ҷамолиддин Камолович бо сабаби ба кори дигар гузаштан аз вазифаи муовини якуми раиси Бонки миллии Тоҷикистон озод карда шавад”.
Ҷамолиддин Нуралиев, ки дар гузашта дар мақомҳои гуногуни ҳукуматӣ кор кардааст, 4-уми майи соли 2015 бо фармони Эмомалӣ Раҳмон муовини раиси БМТ таъйин гардида буд.
То ҳол маълум нест, ки Нуралиев баъд аз барканорияш ба кадом вазифа таъин мегардад. Аммо мешавад ҳадс зад, ки бо доштани падарарусе ҳамчун Эмомалӣ Раҳмон ӯ ба яке аз вазифаҳои калидии дигаре дар ҳукумат ба кор хоҳад рафт.
Ҷамолиддин Нуралиев 44 сол дошта, шавҳари раҳбари Дастгоҳи раёсати ҷумҳурии Тоҷикистон Озода Раҳмон, духтари Эмомалӣ Раҳмон мебошад.
