Рӯзи 28 июн Содир Ҷабборов, президенти Қирғизистон бо сафари расмӣ вориди Душанбе шуд. Ӯро дар фурудгоҳи байналмиллалии Душанбе Сарвазири кишвар Қоҳир Расулзода пешвоз гирифт.
Бино ба иттилои дафтари матбуоти Дастгоҳи Президенти Тоҷикистон, раисҷумҳурони ду кишвар шоми 28 “бо мақсади шиносоӣ бо имкониятҳои рушди соҳаи сайёҳӣ ба бӯстонсаройи беруназшаҳрии “Баҳор”, воқеъ дар ноҳияи Варзоб ташриф оварданд”.
Бино ба навиштаи хабаргузории ҳукуматии “Ховар” сафари президенти Қирғизистон дар Тоҷикистон ду рӯз давом хоҳад кард ва “мулоқоту музокироти сатҳӣ олӣ миёни ду кишвар” дар назар аст.
Аммо аз он дабдабае, ки барои пешвози Шавкат Мирзиёев, президенти Узбекистон ороста буданд, он дар пешвози Ҷабборов дида намешавад.
Бояд гуфт, ки ин аввалин сафари расмии Президенти Қирғизистон Содир Ҷабборов ба Тоҷикистон хоҳад буд.
Баъд аз даргириҳои хунини марзӣ дар охири моҳи апрел гуфта мешуд, ҷонибҳо ба тавофуқ расиданд, ки Содир Ҷабборов барои нишасти рӯ ба рӯ бо Эмомалӣ Раҳмон ва ҳалли мушкилоти марзӣ ба Душанбе ташриф меорад.
