Қурбонгулӣ Бердимуҳаммадов президенти Туркманистон ҳамчун раиси парлумон “Халқ Маслиҳати”-и ин кишвар интихоб гардид. Маросими эълони ин мансаби нави Президент рӯзи 14 апрел баргузор гардид.
Беҳрдимуҳаммадов акнун ҳамзамон ҳам президент, ҳам сарвазир ва ҳам раиси парлумони кишвараш мебошад.
Бино ба навиштаи Радиои Озодӣ, дар рӯйхати 111 даъвогари курсиҳои палатаи болоии порлумони он кишвар, ки рӯзи 1-уми март нашр шуд, номи Бердимуҳаммадов зикр наёфта буд. Аммо Комиcсияи марказии интихоботии он кишвар хабар дод, ки “барои узвият дар Халқ Маслиҳатӣ” 112 номзад сабти ном шуда буд. Зоҳиран, номи президенти Туркманистонро дар лаҳзаҳои охир шомил кардаанд.
Президент Туркманистон ҳамчунин барои писараш Сардор Бердимуҳаммадов низ чанд мансабро “туҳфа” кардааст. Охирин мансабро ӯ рӯзи 12 апрел соҳиб шуд.
Ахиран Сардор Бердимуҳаммадов, ки аллакай се вазифаи роҳбариро соҳиб аст, илова бар онҳо, аз ҷониби ҳокимияти Туркманистон раиси сохторҳои байниҳукуматии туркманӣ-русӣ ва туркманӣ-ҷопонӣ таъйин гашт.
Писари президенти Туркманистон мансаби муовини сарвазирро моҳи феврали соли ҷорӣ соҳиб шуда буд.
Коршиносон Сардор Бердимуҳаммадовро вориси асосии падар медонанд. Аммо пайҳам соҳиб шудани мансабҳои калидӣ аз ҷониби падару писарро коршиносон ба реша давондани низоми диктаторӣ дар ин кишвар арзёбӣ мекунанд.
