Шоми 28-уми сентябри соли ҷорӣ, дар яке аз қаҳвахонаҳо ё шаурмахонаҳои шаҳри Берлин миёни намояндагони ҳукумат ва аъзои Ҳаракати сиёсии “Гурӯҳи 24” занозанӣ рух додааст.
Дар наворҳое, ки ба дасти Azda.tv расид дида мешавад, ки 3 нафар аз намояндагони ҳайати Тоҷикистон дар яке аз қаҳвахонаҳои шаҳри Берлини Олмон ба хариди “шаурма” машғуланд ва дар пушти онҳо намояндагони мухолифон истодаанду ба навор мегиранд.
Ба гуфтаи шоҳидони ин ҳодиса, намояндагони ҳукумат вақте мухолифонро мебинанд, яке худро ронандаи таксӣ ва дигари худро корманди ин қаҳвахона муаррифӣ мекунанд.
Нафаре, ки худро корманди қаҳвахона муаррифӣ кард
Аммо сеюмӣ, ки гуфта мешавад, яке аз муҳофизони Эмомалӣ Раҳмон аст, вақте мебинад, ки онҳоро сабт карда истодаанд бо пояш задда телефони яке аз мухолифонро меафтонад ва ин замон миёни ӯ ва мухолифон занозанӣ шуруъ мешавад.
Навори пурраи ин занозанӣ:
Беҳрӯз Тағойзода, узви фаъоли Ҳаракати сиёсии “Гурӯҳи 24” дар суҳбат ба Azda.tv гуфт, “Нафаре, ки дар дукони шаурмафурӯши бо аъзои “Гурӯҳи 24″ занозанӣ кард, яке аз муҳофизони Эмомалӣ Раҳмон буд. Ва аз ин мешавад хулоса баровард, ягон нафар назди Раҳмон қадр надорад, ҳатто онҳое, ки ҷони ӯро ҳифз мекунанд, чун ба бечораҳо пуле дода нашудааст, ки рафта дар ягон тарабхонаи беҳтар ва замонавӣ хӯрок хӯранд”.
Гуфта мешавад, ин ягона ҳодисае нест, ки дар ин шабу рӯзе, ки Раҳмонов ба Олмон сафар кардааст рух медиҳад.
Замоне ки корвони мошинҳои раисҷумҳури худкома Эмомалӣ Раҳмон ба тарафи бинои садриаъзами Олмон ҳаракат доштанд, аъзои Ҳаракати сиёсии “Гурӯҳи 24” ҷониби ӯ “Диктатор” садо дода, мошинашро бо тухм заданд.
Дар аксҳое, ки баъдтар нашр шуд, дида мешавад, ки Эмомалӣ Раҳмон аз мошине, ки тухмборон шудааст, фаромада истодааст ва хеле ғазабнок метобад.
Ёдовар мешавем, ки бо даъвати расмии мақомоти Олмон раҳбарони кишварҳои Осиёи Марказӣ – Тоҷикистон, Қазоқистон, Қирғизистон, Узбекистон ва Туркманистон барои ҳузур дар нишасти якҷояи ин кишварҳо бо Олмон ва мулоқот бо садриаъзам Олаф Шолтс ва президенти ин кишвар Франк-Валтер Штайнмайер ба Олмон омаданд. Қарор аст, ин сафар то фардо, 30-уми сентябр идома пайдо кунад.
Дар пасманзари сафари раисҷумҳури Тоҷикистон ва дигар раҳбарони кишварҳои Осиёи Марказӣ ба Олмон, мухолифони ин ҳукуматҳо, аз ҷумла мухолифи режими Эмомалӣ Раҳмон рӯзҳои 28 ва 29-уми сентябр дар назди сафаорати Тоҷикистон дар Берлин ва дар макони баргузории нишастҳои президентҳо тазоҳурот баргузор карданд.
