Имрӯз 12-уми феврал додгоҳи шаҳри Бишкеки Қирғизистон иваз намудани ҷойи ҳабси Президенти собиқи ин кишвар Алмосбек Отамбоевро рад кард.
Дар ин бора Замир Жоошев, вакили дифои Отамбоев дар суҳбат бо “Аzattyk” гуфтааст, ки ӯ аз додгоҳ дархост карда буд то зерҳимояаашро таҳти ҳабси хонагӣ қарор бидиҳад вале рад шуд.
“Амалкарди додгоҳҳо, ҳам ноҳиявӣ ва ҳам шаҳрӣ маро дар ҳайрат мегузорад. Ба назар мерасад, ки онҳо мунтазири фармон аз боло ҳастанд. Онҳое, ки бо ҳамин моддаи КҶ ҶҚ гунаҳкор шудаанд, ба ҳабси хонагӣ гирифта шуданд. Онҳое, ки беморанд дар бемористонҳои хусусӣ муолиҷа мешаванд. Вале Алмосбек Отамбоевро на танҳо барои ҳабси хонагӣ раҳо намекунанд, балки имкон намедиҳанд, ки саломатияшро барқарор кунад”, – гуфтааст Жоошев.
Ҳамчунин бо қарори Додгоҳ муҳлати будубоши Отамбоев дар ҳабси пешакӣ то 7-уми апрел тамдид шуд.
Дар ҳоли ҳозир собиқ раиси ҷумҳури Қирғизистон дар маҳбаси №47 ҷое, ки дар охири моҳи декабр бар асари беморӣ аз боздоштгоҳи муваққатӣ ба онҷо бурда шуд, қарор дорад.
Отамбоев ба даст доштан дар фасод, қонунӣ кардани даромадҳои ҷиноӣ, сарватандӯзии ғайриқонунӣ, ғайриқонуни соҳиб шудан ба сарватҳои табӣ ва ғайра муттаҳам мешавад.
Алмосбек Отамбоев 17 сентябри соли 1956 дар Арашан, вилояти Фрунзе ба дунё омадааст. Ӯ аз 1 декабри соли 2011 то 24 ноябри соли 2017 ба ҳайси президенти Ҷумҳурии Қирғизистон ифои вазифа намуд. Ҳамчунин Сарвазири 12 ва 16-уми Ҷумҳурии Қирғизистон буд.
Ба фарқ аз аксар президентҳои дигари Осиёи Марказӣ Отамбоев кӯшиш накардааст, ки ваколатҳои худро пас аз мӯҳлати пешбининамудаи Конститутсия дароз кунад ва ҳокимиятро ба Сооронбай Жээнбеков супорид.
Дар моҳи июни соли 2019, парлумони ҷумҳурӣ бинобар иттиҳомоте, ки алайҳи ӯ эълон шуд ва боиси оғози як қатор парвандаҳои ҷиноӣ гардид, ӯро аз мақоми президенти собиқ ва масуният маҳрум кард.
