Додситонии кулли Тоҷикистон бо нашри баёнияе рӯзи 17-уми апрел хабар дод, ки собиқ раиси ноҳияи Файзобод Миралӣ Раҷабзода бо судури чанд фармон даст ба амалҳои ғайриқонунӣ задааст.
Раҷабзодаро Додситонӣ ба он муттаҳам карда, ки давоми солҳои 2019 ва 2020 “бо қарорҳои ғайриқонунии худ аз ҳисоби заминҳои таъиноти кишоварзӣ барои сохтмони ҳаргуна иншоот ба шахсони воқеӣ ва ҳуқуқӣ ҷудо карда додааст”.
Дар хабар таъкид мешавад, ки ҷудо намудани заминҳои кишоварзӣ барои сохтмони биною иншоот дар салоҳияти худи Ҳукумати Ҷумҳурии Тоҷикистон аст, аммо бо вуҷуди ин раиси ноҳияи Файзобод аз пеши худ ба тақсими заминҳо чарогоҳӣ ва наздиҳавлигӣ ғайриқонунӣ даст задааст.
Дар пайи парвандаи собиқ раиси ноҳияи Файзобод, нисбати чанд масъули дигри ноҳия низ парвандаҳо боз шудааст. Тавре Додситони кул хабар дод, “нисбати собиқ раиси кумитаи идораи замини ноҳияи Файзобод, Ҳасанов И.И., аъзоёни комиссияи мақомоти иҷроияи ҳокимияти давлатии ноҳияи Файзобод ва роҳбари ХД “Бедил” Раҳимов Қ.Қ. барои ғайриқонунӣ додани замин, қаллобӣ ва сохтакории шаҳодатномаи конунгардонии молу мулк бо моддаҳои 3381 қисми 2 банди “б” (гайриқонунӣ додани замин бо истифода аз ваколати мансабӣ), 247 қисми 4 банди “б” (қаллобӣ ба миқдори махсусан калон) ва 340 қисми 2 банди “б” (сохаткории ҳуҷҷатҳо аз ҷониби гурӯҳи шахсон бо маслиҳати пешакӣ) КҶ Ҷумҳурии Тоҷикистон парвандаи ҷиноятӣ оғоз гардида, баъд аз анҷом ёфтани тафтишоти пешкӣ, барои моҳиятан баррасӣ намудан ба суд фиристода шудааст.”
Аммо дар хабар аз боздошт ва парванда боз шудан нисбати худи Раҷабзода чизе гуфта намешавад. Танҳо ишора шуда, ки 15 адад фармонҳои ғайриқонунии раиси ноҳия бекор, 0,75 га замини наздиҳавлигӣ ба ҳолати аввала баргардонида шуда ва маблағи 28505 сомонӣ андози замин ба фоидаи буҷети давлат ситонида шуд.
Аммо назари худи Раҷабзода, собиқ раиси ноҳияи Файзобод дар бораи иттиҳомоти эълоншуда алайҳи ӯ дастрас нест.
Раҷабзода Миралӣ бо фармони Эмомалӣ Раҳмон аз 9-уми апрели соли 2015 ҳамчун иҷрочии раиси ноҳияи Файзобод ва баъдан раиси ноҳия таъйин гардида, 24-уми ноябри соли 2020 бо сабаби “ба дигар кор гузаштан” аз вазифаи раиси ноҳияи Файзобод сабукдӯш карда шуд.
Хариду фурӯши заминҳо ба сурати ғайриқонунӣ дар Тоҷикистон ба як падидаи ҳалнашаванда табдил ёфтааст. Таҳлилгарон даст задани раисону масъулони баландпояи шаҳру ноҳияҳоро ба заминфурӯшӣ ва фасод дар он мебинанд, ки худи онҳо бо ришва мансаб харидаанд ва ин кор онҳоро водор мекунад то ба фасодкорӣ ва ришваситонӣ дар ҳама соҳаҳо идома бидиҳанд.
