Раҷабалӣ Одинаев, раиси ширкати дар гузашта пурнуфузи “Умед-88”, ки дар бемористон аз бемории меъда табобат мегирифт, баъд аз зуҳри рӯзи 7 апрел аз дунё даргузашт.
Пайвандони марҳум ба Радиои Озодӣ гуфтанд, маросими ҷаноза рӯзи панҷшанбе дар деҳаи “Дараи калот”-и ноҳияи Ҳамадонӣ баргузор мешавад.
Моҳи гузашта расонаҳо хабар дода буданд, ки вазъи саломатии мудири ширкати “Умед-88” бад шуда, дар бемористони “Ёрии таъҷилӣ”-и шаҳри Душанбе бистарӣ шудааст. Табибон гуфтанд, Раҷабалӣ аз дарди меъда пештар ҳам ранҷ мебурд ва дар шароити бади зиндон ин беморӣ дигарбора хуруҷ кардааст. Ӯро ҷарроҳӣ низ карда буданд.
Ёдовар мешавем, ки ширкати “Умед-88” то соли 2017 ягона ширкати таъминкунандаи сӯзишвории берун аз доираи хонавода ва рақиби “Фароз” дар кишвар ба ҳисоб мерафт.
14 октябри соли 2017 раисҷумҳур дар дар мулоқот бо соҳибкорон аз молики ин ширкат интиқод карда гуфт, ки 170 миллион сомонӣ маблағи буҷетро барнагрдонидааст. Пас аз интиқоди Раҳмон Одинаев боздошт ва бо иттиҳоми “тасарруфи амволи давлатӣ” гунаҳкор дониста барои 28 сол равонаи зиндон гашт.
Ин ҳама иттиҳомотро наздикони ӯ рад карданд ва ҳатто аз ҷониби ӯ дархост шуд, ки ӯро озод кунанд, он миқдор маблағе, ки давлат ӯро дар тасарруфаш гунаҳкор меҳисобад, бозпас мегардонад. Аммо мақомот ин пешниҳоди Одинаевро рад кард.
