Раҳматилло Зоиров раиси ҲСДТ-ягона ҳизби мухолифи дар кишвар пас аз 20 соли раҳбрӣ дар ин ҳизб тарки вазифа кард. Зоирови 64-сола, ки дар гузашта мушовири Президент Раҳмон ҳам буд, аз замони таъсисёбии ҳизбаш дар соли 1999 раҳбарии онро бар уҳда дошт.
Зойиров сабаби асосии рафтан аз раҳабарии ҳизбро ба вазъи саломатияш рабт дода, ба рӯзноманигорон гуфт, ки чанд муддат аст дарди пой ӯро азият медиҳад.
“20-уми сентябри соли гузашта зарбаи сахт хӯрдам. Аз он замон дарди пой гум нашуд. Барои ҳамин, ба Шӯрои сиёсӣ ариза навишта илтимос кардам, ки анҷуман баргузор нашуд, маро озод кунанд. Ман бояд табобат кунам.”
Ҳамазмон ӯ ба рӯзноманигорон сабаби дигари рафтанашро дар “дурудароз мондан дар мақоми раҳбарӣ” гуфта аст.
Феълан раҳбарии ин ҳизб бар уҳдаи Қиёмиддин Азизов гузошта шуда аст. Гуфта мешавад, Азизов 41 сол дорад ва то ин дам ба ҳайси яке аз муовинони раиси ҲСДТ кор карда аст. Аммо Шокироҷон Ҳакимов муовини аввали раиси ҲСДТ гуфта, ки бар асоси оинномаи ҳизб дар сурати бемории раис масъулият ба зиммаи муовини аввал мегузарад, на каси дигар.
Ҳакимов дар сӯҳбат ба Радиои Озодӣ ин қарорро зери суол бурда мегӯяд, ки асли қазия барояш маълум нест, вале ба гуфти ӯ, шояд Зоиров таҳдид шуда ва ҷонаш дар хатар аст.
Ӯ мегӯяд: “Вақте раис вафот кард, фалаҷ шуд, ягон сафари хориҷӣ рафтаву бозгашташ маълум нест, ё дигар ҳолат бошаду истеъфо диҳад, иҷрои вазифаи раиси ҳизб ба уҳдаи муовини аввали раиси ҳизб вогузошта мешавад. Ин меъёри оиннома аст. Баъд Шӯрои сиёсиро муовини раиси ҳизб даъват мекунад ва аъзоро дар ҷараён мегузорад. Шояд таҳти таҳдид қарор дорад ё ҷонаш дар хатар аст, ё дигар ҳолатҳо, ки ман намедонам.”
Ҳизби сотсиал – демократи Тоҷикистон соли 1999 сабтином шудааст. Зоиров аз соли 2002 раиси ин ҳизб буд ва сиёсатҳои ҳукуматро пайваста танқид мекард. Ин ҳизбро ягона ҳизби сиёсии мухолиф дар Тоҷикистон медонанд. Соли гузашта ҳизби Зойиров интихоботи раисҷумҳури Тоҷикистонро, ки аз 6-уми ноябр ба як моҳ пеш, 11- уми октябр гузаронида шуд, баргузории онро ғайриқонунӣ номида бойкот кард.
Ӯ гуфта буд: “таъйини интихоботи раисҷумҳури ҶТ барои ба 11-уми октябри соли 2020, ки як моҳ қабл аз ба итмом расидани салоҳияти раисҷумҳур, ки тамоми қонунҳои интихоботӣ аз он сарчашма мегиранд, комилан ғайриқонунӣ мебошад!”
Дар гузашта низ борҳо гуфтааст, Эмомалӣ Раҳмон, ки аз соли 1994 то кунун раисҷумҳури Тоҷикистон аст, ҳақ надорад дар интихоботҳо ширкат кунад.
