Эмомалӣ Раҳмон аз созмонҳои байналмилалӣ, кишварҳои минтақа ва ҷаҳон интиқод кард ва гуфт, ки 20 сол мешавад ки ба талабҳои ӯ дар ҳалли масъалаҳо беэътиноӣ зоҳир мекунанд.
Раҳмон мегуяд: “зиёда аз бист соли охир ман аз минбарҳои ташкилоту созмонҳои байналмилалӣ ва дигар ҳамоишҳои байналхалқӣ ҳалли масъалаи Афғонистонро ба ҷомеаи ҷаҳонӣ даҳҳо бор иброз дошта, таъкид намудам, ки қазияи Афғонистон роҳи ҳалли низомӣ надорад ва бояд танҳо бо роҳи музокирот ҳаллу фасл карда шавад. Вале ҷомеаи ҷаҳонӣ, аз ҷумла доираҳои манфиатдору дахлдор ба ҳалли ин масъала то андозае бетафовутӣ зоҳир карданд”.
Раҳмон дар ин бора зимни Суханронияш дар ҷаласаи ботантана ба муносибати 30 – солагии истиқлолияти давлатӣ сӯҳбат кардааст. Расиҷумуҳури Тоҷикистон Эмомалӣ Раҳмон ҳамзамон дар ин сӯҳбаташ бори дигар таъкид карда, ки дар Афғонистон ташкили ҳукумати фарогир ва бо дарназардошти манфиатҳои ҳамаи қавму миллатҳои сокини он, раъйи тамоми мардуми мамлакат, эҳтирому риояи ҳуқуқи шаҳрвандон дар доираи меъёрҳои аз ҷониби ҷомеаи ҷаҳон пазируфташуда ва нақши калидии Созмони Милали Муттаҳид дар пешбурди ин равандро мехоҳад.
Эмомлӣ Раҳмон дар идомаи сӯҳбаташ вобаста ба вазъи ногуфвори Афғонистон гуфт, ки барои ба миён омадани чунин вазъи фоҷиабор мардуми Афғонистон гуноҳ надоранд, ва дар ноамнӣ ва бадбахтие, ки ба сари мардуми ин кишвар омадааст, натиҷаи дахолати кишварҳои хориҷиро калидӣ донист.
Аммо дар айни ҳол ӯ аз кишварҳои хориҷӣ талаб кард, ки дар чунин вазъ мардуми Ағонистонро танҳо нагузоранд.
“Ҳамчунин, мехоҳам боз як нуктаи муҳимро таъкид намоям, ки ҷомеаи ҷаҳон, аз ҷумла кишварҳои манфиатдор ҳуқуқи маънавӣ надоранд, ки мардуми Афғонистонро бо мушкилоти бавуҷудомада танҳо гузоранд”.
Раҳмон мегуяд: Ман дар ҳайратам, ки тамоми ниҳодҳои байналмилалӣ оид ба ҳуқуқи башар хомӯширо ихтиёр кардаанд ва дар мавриди пуштибонӣ аз ҳуқуқи мардуми Афғонистон ҳеҷ гуна ташаббус нишон намедиҳанд.
Сӯханҳои ғамхоронаи Раҳмон аз мардуми Афғонистон дар ҳоле садо медиҳад, ки пештар вазири корҳои дохилии Тоҷикистон Рамазон Раҳимзода эълон карда буд, ки дар марзи Афғонистон бо Тоҷикистон 80 оилаи муҳоҷир ҳузур дорад ва Тоҷикистон ба сабаби надошти зерсохторҳои қабули муҳоҷирон наметавонад аз онҳо пазироӣ кунад.
Инчунин телевизиони Эронинтернешнал наворе нашр кард, ки дар он 80 паноҳҷӯи Афғонистон иддаъо мекарданд, ки пас аз ворид шудан ба хоки Тоҷикистон мақомоти тоҷик онҳоро фиреб дода, ба нимҷазирае дар байни Омӯдарё оварда бесаробон гузоштанд.
Дар навор ин муҳоҷирон аз надоштани сарпаноҳ, ба охир расидани маводҳои хӯрака ва авҷ гирифтани беморӣ дар байни онҳо шикоят карда, аз созмонҳои байналмилалӣ талаби кумак мекарданд.
Аз ҷониби дигар Ҳукумати Эмомалӣ Раҳмон, ки амалан ба як низоми ҳукумати хонаводагӣ ва гурӯҳӣ табдил шудааст, дар умри 30-солааш ягон маротиба интихоботи озод ва ҳукумати ҳамашумул, ки дар он тамоми нерӯҳои сиёсии Тоҷикистон мақоми шоистаи худро дошта бошанд, ташкил накардааст.
