Субҳи рӯзи 24-уми июли соли ҷорӣ рафтуои тамоми анвои мошинҳо дар шоҳроҳи Душанбе-Чаноқ муваққатан баста шуд.
Филиали ширкати “Инновейтив Роуд Солюшнз ЛТД” дар Тоҷикистон дар саҳифаи фейсбукияш хабар дод, ки “бинобар лағзиши кӯҳпораи азим дар километри 121- уми масири Душанбе – Чаноқ роҳ муваққатан баста шуд.”
Масъулини ширкат навиштанд, ки пас аз резиши сангпораҳои бузург дар роҳ, ба ҷои ҳодиса техникаҳои филиали Ширкат фиристода шуданд.
Акс аз саҳифаи фейсбукии филиали “Инновейтив Роуд Солюшнз ЛТД”
Бо гузашти ду соат аз иттилои аввал масъулини ширкат хабар доданд, ки сангпораҳои афтида аз кӯҳ, ки боиси баста шудани муҳимтарин шоҳроҳи Тоҷикистон, ки пойтахтро ба шимоли кишвар мепайвандад, бартараф шуда, “ҳаракати нақлиёт таъмин гардид!”
