Як ҷавони 24-солаи сокини ноҳияи Рудакӣ ҳангоми ҳаракат бо мошинаш ба самти шаҳри Ҳисор аз идораи он набаромада, як модарро ҳамроҳи ду фарзанди ноболиғаш пахш кард, ки дар натиҷа ҳарсе ҳалок шуданд.
Тавре Вазорати корҳои дохилаи Тоҷикистон хабар медиҳад, 14-уми августи соли 2022, тахминан соати 23:30-дақиқа, сокини ноҳияи Рӯдакӣ Гулямов Меҳроҷиддини 24-сола, ронандаи автомашинаи тамғаи “Тойота Камри” бехатарии ҳаракат дар роҳро таъмин накарда, дар деҳаи Меҳрободи шаҳри Ҳисор Расулова Манижаи 27-соларо ҳамроҳи ду фарзандаш, яке таваллуди соли 2017 ва дигаре 2022 пахш кардааст.
Ба иттилои манбаъ, модари ин кӯдакон Расулова Манижа ба сабаби бардоштани ҷароҳатҳои вазнини ҷисмонӣ дар ҷои ҳодиса ба ҳалокат расида, аммо кӯдакон баъд аз интиқол ба беморхона ҳарду ҷон бохтанд.
Вазорати корҳои дохилаи кишвар мегӯяд, нисбати ин ҳодисаи нохуш таҳқиқоти пешакӣ идома дорад. Назари боздоштшуда ва ё наздикони ҳалокшудаҳо дастраси расонаҳо нест.
