Вазорати корҳои хориҷаи Русия 27-уми апрел эълом кард, ки дар иқдоми мушобеҳе алайҳи 287 намояндаи парлумони Бритониёи Кабир таҳрим ҷорӣ кардааст.
Вазорати корҳои хориҷаи Русия мегӯяд, ин иқдом дар посух ба қарори Ҳукумати Бритониё аз 11-уми марти соли чорӣ гирифта шудааст. Дар ин қарор Ҳукумати Бритониё 386 вакили Думаи давлатии Маҷлиси федеролии Русияро ба феҳристи таҳримҳо ҷорӣ карда буд.
Маскав мегӯяд, 287 намояндаи парлумони Бритонё дигар ҳаққи вуруд ба хоки Русияро надоранд. Ба иддаои ВКХ Русия ин намояндагон биритониёӣ ба далели “иштирок ва саҳм доштан дар таритиби абзори таҳримҳо бар зидди Русия” шомили феҳристи таҳримҳо шудаанд.
Ҳамчунин Маскав вакилони парлумони Бритониёро ба “таҳқири беасос ва саҳм доштан дар афзоиши русҳаросӣ дар Бритониё” муттаҳам кард.
Бар асари ин таҳримҳо дороиҳои намояндагони прлумони Бритониё дар Русия боздошта мешавад ва дигар иҷозати сафар ба ин кишварро надоранд.
Пас аз ҳамлаи Русия ба Украина кишварҳои ғарбӣ таҳримҳои шадиде алайҳи Маскав ҷорӣ карданд ва ҳудуди 400 дипломаташ аз аврупо барун карда шуд.
