Вазорати корҳои дохилии Русия мӯҳлати будубоши муҳоҷиронро, ки ғайриқонунӣ дар қаламрави кишвар қарор доранд, тамдид мекунад. Барои ин шаҳрвандони хориҷӣ бояд ба шӯъбаи мақомот муроҷиат кунанд.
Муроҷиати дахлдор ба шаҳрвандони хориҷӣ рӯзи чоршанбеи 21 апрел аз ҷониби Хадамоти матбуоти ВКД нашр карда шуд.
Тавре ки дар матни муроҷиатнома омадааст, шаҳрвандони давлатҳои хориҷӣ, ки талаботи будубоши қонуниро риоя накардаанд, метавонанд “вазъи ҳуқуқиро бидуни татбиқи муҷозот ҳал кунанд.” Ин тадбир тибқи фармони президент Владимир Путин гирифта шудааст.
ВКД-и Русия таъкид намудааст, ки тамоми чораҳои заруриро барои ҳимояи ҳуқуқ ва озодиҳои шаҳрвандони хориҷӣ ва амнияти онҳо ҳангоми будубош дар Русия дар шароити марбут ба коронавирус андешида истодааст.
Пештар муовини вазири корҳои дохилии Русия Александр Горовой аз намояндагони кишварҳои ИДМ дархост кард, ки дар мавриди муҳоҷирони ғайриқонунии дар Русия ҳузурдошта чораандешӣ кунанд, то кор ба ихроҷ кардани онҳо нарасад.
Тибқи иттилои вазорат, беш аз 300 ҳазор шаҳрванди Узбекистон, наздики аз 250 ҳазор зодагони Тоҷикистон, инчунин садҳо ҳазор муҳоҷирон аз Украина, Озарбойҷон, Арманистон, Қирғизистон ва Қазоқистон дар қаламрави Русия ғайриқонунӣ қарор доранд.
