Вазорати корҳои хориҷаи Русия хабар дод, ки барои пешгирӣ аз ифротгароӣ ва терроризм бо муҳоҷирони кории мусалмон аз кишварҳои ИДМ ҳамкорӣ кардан мехоҳад.
Бино ба таъкиди намояндаи Вазорати корҳои хориҷии Русия Александр Мусиенко, дар Русия муҳоҷирони кории мусалмон аз кишварҳои Осиёи Марказӣ ва Қафқоз зиёданд ва бояд бо онҳо ҳамкориро зичтар кард.
Рӯзи чаҳоршанбе 20 июл муовини раисии шуъбаи кор бо кишварҳои ИДМ-и Вазорати корҳои хориҷии Русия Александр Мусиенко дар мизи гирди бахшида ба “нақши дин дар ҷилавгирӣ аз ифротгароӣ ва терроризм” изҳор дошт, ки фаъолият дар мавзуи динро бо муҳоҷирони кории Осиёи Марказӣ ва Қафқоз дар Русия пурзӯр кардан зарур аст.
“Теъдоди зиёди муҳоҷирони корӣ аз кишварҳои Осиёи Марказӣ ва Қафқоз дар қаламрави Федератсияи Русия фаъолият мекунанд. Бинобар ин, зарур аст, ки сатҳи муносибат бо онҳо баланд бардошта шавад, зеро аксар вақт онҳо ба шароити ин ҷо мутобиқ намешаванд”, – гуфт ӯ.
Мусиенко афзуд, ки вақтҳои охир ба қайд гирифта шудааст, ки ҷиноятҳои содиршаванда аз ҷониби муҳоҷирон афзоиш ёфтааст. “Ин, албатта, ба муносибатҳои хуби мо бо ин кишварҳо, ки хуссусияти стратегӣ ва шарикӣ дорад, таъсири манфӣ мегузорад”, – таъкид кард намояндаи ВКХ.
Ба гуфтаи ин мақомдор, Русия муҳоҷиронеро, ки барои кор ба Русия меоянд, ҳаматарафа хуб истиқбол мекунад. “Дар баробари ин, мо бояд фикр кунем, ки чӣ гуна ин ҷамъияти чандмиллионнафараи мусалмононро фаро гирем, зеро аксар вақт онҳо аз назари рӯҳониёни кишвари мо дур мемонад”, – мегӯяд Мусиенко.
