Думаи давлатии Русия Лоиҳаи берун кардани Ҳаракати Толибонро аз “феҳристи сиёҳ” ва ё рӯйхати “гурӯҳҳои террористӣ” баррасӣ мекунад.
Ба иттилои расонаҳои русӣ, лоиҳаи мазкур пешбинӣ мекунад, ки “манъи фаъолияти созмоне, ки ба феҳристи ягонаи федералии созмонҳои дохилӣ ва хориҷиву байналмилалие, ки тибқи қонунгузории Федератсияи Русия террористӣ эътироф шудаанд, мумкин аст бо қарори додгоҳ муваққатан боздошта шавад.”
Гуфта мешавад, пеш аз баррасии ин масъала дар Думаи давлатӣ бояд Додситонии кулли Русия далелҳои воқеӣ ва қонеъкунанда пешниҳод кунад ва баъд аз он Додгоҳи олии ин кишвар метавонад Ҳаракати Толибонро аз “феҳристи сиёҳ” ва ё гурӯҳҳои террористӣ, ки фаъолияташон дар қаламрави ин кишвар мамнуъ аст, берун кунад.
Ин ҳам дар ҳоле сурат мегирад, ки 25-уми ноябри соли ҷорӣ расонаҳои афғонистонии марбут ба Толибон хабар доданд, ки Сергей Шойгу, дабири кулли Шӯрои амнияти Русия ба Кобул сафар кардааст ва онҷо бо Абдулғанӣ Барадар, муовини нахуствазири Афғонистон “музокирот” анҷом додааст.
Шойгу зимни мулоқот бо муовини нахуствазири Толибон таъкид карда, ки “Русия барои рушди ҳамкориҳои дуҷониба ва таҳкими равобити сиёсӣ ва иқтисодӣ бо Афғонистон қасд дорад Иморати исломиро аз феҳристи сиёҳи Русия берун кунад.”
