Дар рӯзи дуввуми Ҷоми ҷаҳонии футбол-2022, ки дар давлати Қатар ҷараён дорад, 3 бозии дигар баргузор гардид.
Ин рӯз бо пирӯзии бузурги тими Англия бар Эрон бо ҳисоби 6:2 оғоз шуд.
Бозигарони мунтахаби Эрон вақте суруди миллиашон садо медод аз замзама кардани он худдорӣ карданд. Ба гузориши баъзе аз расонаҳо, бо ин роҳ бозигарон пуштибонии худ аз эътирозгарони дохили кишварашонро нишон доданд.
Ҳамчунин футболбозони тими миллии Англия бо зону задан аз ҳаракати Black Lives Matter (харакати чамъиятии зидди нажодпарастӣ ва зӯроварӣ ба муқобили сиёҳпустон,) пуштибонӣ карданд.
Аллакай дар дақиқаи ҳаштуми ин бозӣ, Эрон аз дарвозабони асосии худ Алиризо Бейранванд маҳрум шуд. Дарвозабони эронӣ бо ҳимоятгар Маҷид Ҳусейнӣ рӯ ба рӯ бархӯрд ва аз ҳуш рафт. Пзишкон ба ӯ бештар аз даҳ дақиқа ёрӣ расонданд. Дар натиҷа Алиризо бозиро идома дода натавонист ва ба ҷои ӯ Ҳусейн Ҳусейнӣ вориди майдон шуд.
Бар асари осеби Бейранванд довар Рафаэл Клаус ба қисми аввали бозӣ 14 дақиқа илова кард ва ин қисми вохӯрӣ бо ҳисоби 3:0 анҷом ёфт. Ба қисми дуюми вохӯрӣ даҳ дақиқаи дигар илова карда шуд.
Дар натиҷа дастаи Эрон аз дастаи Англия 6 бар 2 мағлуб шуд. Ҳарду голи мунтахаби Эронро Меҳдӣ Таремӣ (якеаш аз пеналтӣ) ба нишон расонд.
Карлуш Кейруш, мураббии мунтахаби Эрон пас аз ин бозӣ аз бозигаронаш ҳимоят ва рафтори мухлисонашро танқид кард.
“Шумо дидед, ки имрӯз чӣ шуд. Чаро онҳо [мухлисҳо] ба ин ҷо омаданду моро дастгирӣ накарданд? Агар дар хона мемонданд, хеле беҳтар мебуд. Мо ба онҳо ниёз надорем. Бозигарон ҳама чизро эҳсос мекунанд ” гуфт Карлуш.
Пас аз як соат аз анҷоми бозии тимҳои Эрон ва Англия бозии Сенегал ва Ҳолланд оғоз шуд. Ин бозӣ ба фоидаи Ҳолланд бо ҳисоби 2:0 анҷом шуд. Дар дақиқаи 84 ва 99 Коди Гакпо ва Дэви Классен гол заданд.
Инчунин бозии дигар миёни мунтахабҳои ИМА ва Уэлс баргузор гардида, ҳарду тим ба дарвозаҳои якдигар як голӣ заданд. Дар дақиқаи 36-ум ҳисобро аз Амрико Тимоти Веаи 22-сола боз кард. Тимоти Веа ҳамлагари дастаи “Лилл”-и Фаронса буда, писари барандаи “Тӯби тиллоӣ” дар соли 1995 ва президенти феълии Либерия Ҷорҷ Веа мебошад.
Дар дақиқаи 81-ум Гарет Бэйл аз Уэлс пеналтиро ба ҳадаф расонда, ҳисобро баробар кард.
Ҷоми ҷаҳонии футбол-2022 дар далати Қатар аз 20-уми ноябр оғоз шуда, финали қаҳрамонӣ рӯзи 18-уми декабр дар Варзишгоҳи миллии Лусаил, ки дорои 80 ҳазор ҷойи нишаст барои тамошобинон аст, баргузор хоҳад шуд.
Дар аввалин бозии Ҷоми ҷаҳон 2022 дастаи мунтахаби Қатар, ки мизбони ин бозиҳост аз тими Эквадор бо ҳисоби 0:2 шикаст хӯрд.
