Ширкати ҳавопаймоии Nordwind аз ифтитоҳи парвози мустақим байни шаҳри Қазони Ҷумҳурии Татаристон ва шаҳри Бохтари маркази вилояти Хатлони Тоҷикистон хабар дод.
Гуфта мешавад, парвозҳои мустақим байни ин ду шаҳр аз 12 сентябри соли ҷорӣ оғоз шуда, дар як ҳафта як маротиба анҷом мешавад. Ба иттилои ин ширкати ҳавопаймоӣ, парвозҳо рӯзҳои панҷшанбе тавассути ҳавопаймоҳои Boeing 737-800 бо ғунҷоиши 189 мусофир анҷом дода мешаванд.
Дар хабар зикр мешавад, ки парвоз аз Қазон бо хатсайри рақами N4-1441 соати 03:20 ва замони фурӯд дар Бохтар соати 08:45 ба вақти маҳаллӣ анҷом меёбад, аммо аз Бохтар ба Қазон бошад, бо хатсайри N4-1442 соати 10:15 ва расидан ба Қазон соати 11:50 ба нақша гирифта шудааст.
Ин ширкати ҳавопаймоӣ иттилоъ медиҳад, ки аллакай билетҳо барои ҳарду тараф ба фурӯш гузошта шудааст.
