Президенти Тоҷикистон дар раъси як ҳайати баландпояи кишвар бо сафари кори озими Туркманистон шуд.
Бино ба иттилои расмӣ, 11-уми октябри соли 2024, Эмомалӣ Раҳмон барои иштирок дар нишасте зери унвони “Робитаи замонҳо ва тамаддунҳо – асоси сулҳу инкишоф” вориди Ишқободи Туркманистон шуд.
Ба қавли манбаъ, Президенти Тоҷикистон, ки дар ин ҳамоиш суҳбат мекард, гуфт: “Эҷодиёти Махдумқулӣ саршори ғояҳои башардӯстӣ, ба монанди дӯстӣ, бародарӣ, хайрхоҳӣ, ғамхорӣ нисбат ба одамон ва хулқу атвори неки инсонӣ аст. Мероси ӯ, бешубҳа, пули пайвандгаре дар роҳи тавсеаи робитаҳои байнифарҳангӣ ва ба ҳам наздик гардидани кишварҳои мо ва мардумонамон мебошад.”
Ин ҳамоиш ба муносибати 300-умин солгарди ин шоири туркман баргузор гардида, дар кори он бар иловаи Эмомалӣ Раҳмон сарони кишварҳои Осиёи Марказӣ ва дигар минтақа, аз ҷумла Презиеднти Эрон, Президенти Русия низ иштирок ва суханронӣ кардаанд.
Гуфта мешавад, Махдумқулӣ Фироқӣ писари шоири туркман Давлатмуҳаммад Озодӣ аст. Махдумқулӣ дар соли 1754 ба Бухоро ва соли 1757 ба Хева, сипас ба баъзе шаҳрҳои Афғонистони кунунӣ ва Ҳиндустон рафта, дар мадрасаҳои ин шаҳрҳои бузург таҳсил кардааст. Маҳз муҳити фарҳангии Бухоро, ки гаҳвораи тамаддуни тоҷикон аст, дар ташаккули шахсияти шоир нақши босазо гузоштааст.
Ин сафари Эмомалӣ Раҳмон ва дигар сарони кишварҳои минтақа дар ҳоле ба Туркманистон сурат гирифтааст, ки бархе коршиносон баргузории чунин маросими пурдабдабаро ба як навъе “чойгардак” байни сарони кишварҳо ташбиҳ медиҳанд.
Ба гуфтаи онҳо, тамоми сарфу харҷи сафарҳо аз буҷаи давлат пордохт мешавад. Тоҷикистон аз ҷумлаи фақиртарин кишварҳои дунё дониста мешавад. Фасоди идорӣ ва ахлоқӣ ба авҷи худ расидааст. Эмомалӣ Раҳмон бо истифода аз ин шароит моҳе чанд маротиба “ҷойгардак” мекунад. Барои мисол, вай танҳо дар камтар аз як моҳи ахир панҷ сафари корӣ ба хориҷа, аз ҷумла ба Қазоқистону Русия, Амрикову Қатар ва инак ба Туркманистон анҷом додааст, ки тамоми сарфу харҷи онҳо аз ҳисоби буҷа пардохт мешаванд.
