Президенти Тоҷикистон барои ширкат дар се нашасти минтақавӣ, ки бо ҳузури сарони кишварҳо ва намоядаҳои воломақоми ин давлатҳо сурат мегирад, ба шаҳри Остонаи Қазоқистон рафт.
Бино ба иттилои Хадамоти матбуоти Президенти Тоҷикистон, шоми 12-уми октиябри соли 2022 Эмомалӣ Раҳмон дар раъси як ҳайъати баландпояи Тоҷикистон озими пойтахти Қазоқистон, шаҳри Остона шуд.
Ба қавли манбаъ, “Эмомалӣ Раҳмон бо мақсади иштирок дар Ҳамоиши шашуми Машварати ҳамкорӣ ва тадбирҳои боварӣ дар Осиё, Ҷаласаи Шӯрои сарони давлатҳои аъзои Иттиҳоди Давлатҳои Мустақил ва Саммити сарони давлатҳои Осиёи Марказӣ ва Федератсияи Русия” ба ин кишвар сафар кардааст.
Гуфта мешавад, имрӯзу фардо дар ҳошияи ин нишастҳо бо ҳузури Эмомалӣ Раҳмон ва ҳайъати ҳамроҳаш мулоқотҳои алоҳидае бо бархе намояднаҳои воломақоми кишварҳои узви ин созмонҳои минтақавӣ низ баргузор мешавад.
