Имрӯз, 16-уми ноябри соли 2023 Рустами Эмомалӣ, раиси шаҳри Душанбе ва Маҷлиси миллии Маҷлиси Олӣ ва писари раисҷумҳури Тоҷикистон Эмомалӣ Раҳмон ба шаҳри Бишкеки Қирғизистон сафар кард.
Бино ба иттилои сомонаи расмии Маҷлиси миллии Маҷлиси Олӣ, сафари Рустами Эмомалӣ ба ин кишвар барои иштирок дар ҷаласаи навбатии Шӯро ва ҷаласаи 56-уми Ассамблеяи Байнипарламентии давлатҳои иштирокчии ИДМ сурат гирифтааст.
Инчунин писари раисҷумҳур дар Конференсияи байналмилалӣ бахшида ба 85-умин солгарди таъсисёбии Жокоргу Кенеши Қирғизистон иштироку суханронӣ кардааст.
Рустами Эмомалӣ зимни суханронияш аз парлумони Қирғизистон таърифу тавсиф карда гуфтааст, ки он “дар муайянсозии роҳҳои рушди минбаъдаи демократияи намояндагӣ, ташаккули заминаҳои мусоиди ҳуқуқӣ барои гузаронидани ислоҳот фаъолона иштирок намуда, дар таъмини рушди устувори Ҷумҳурии Қирғизистон ҳамчун давлати соҳибихтиёр, нақши муассир дорад”.
Ҳамзамон, Рустам дар ҳошияи ин ҷаласаҳо бо Валентина Матвиенко, раиси Шӯрои Федератсияи Маҷлиси Федералии Русия мулоқот намуда, аз густариши ҳамкориҳои дуҷониба дар самтҳои тиҷоратию иқтисодӣ ва фарҳангию гуманитарӣ гуфтаанд.
