Сомонаи “Фараж” дар як гузориши худ, аз зиёд гардидани талбандаҳо дар вилояти Хатлон хабар додааст.
Ба навиштаи вебсайти “Фараж” дар кӯчаву хиёбон ва бозори марказӣ маъмурияти вилояти Хатлон нафарони зиёд ба талбандагӣ машғуланд.
Аксари афроде, ки дар кӯчаву бозорҳои шаҳри Бохтар талбандагӣ мекунанд, синнашон аз 60-сола боло буда, байни онҳо кӯдакони ноболиғ ва занони миёнасолро низ вохӯрдан мумкин аст, омадааст дар хабар.
Беш аз 10 нафар талбандаҳо, ба хабарнигори “Фараж” гуфтаанд, ки тангии рӯзгор, нигоҳубин нашудан аз ҷониби фарзандон, ба муҳоҷирати меҳнатӣ рафтану барнагаштани шавҳарон, бекасиву маъюбӣ онҳоро водор кардааст, ки дар кӯчаю хиёбонҳо нишаста, аз мардум кумак талаб мекунанд.
Тоҷинисо Содиқова — зодаи ноҳияи Қубодиён, ки ӯ дар назди бозори “Фаровон” ба талбандагӣ машғул аст, гуфтааст:
се фарзанд дорам, фарзанди калониам писар асту дар як садамаи нақлиётӣ маҷрӯҳ шуд, худам низ маъюбм, ки 120 сомонӣ нафақа мегирам ба ҳеҷ чиз намерасад.
Дар идома гуфтааст: Барои нигоҳубини фарзандонам ва барои харидории дору, лавозимоти мактабӣ, китобу қалам ва хӯрокашон ҳар рӯз ба кӯча баромадаву аз мардум кумак талаб мекунам,- ба ҷуз талбандагӣ дигар чорае надорам.
«Рӯзе то 20 сомонӣ ҷамъ мекунам, мутаассифона, рӯзе мешавад, ки як сомонӣ ҳам пайдо намекунам. Мисли ман чунин касоне, ки ба кумаки мардум ниёз доранд, имрӯзҳо хеле зиёданд». Гуфтааст, ин модари муҳтоҷ.
Сокини дигар аз шаҳри Бохтар Малика гуфтааст: шавҳарам ба Русия рафта, дигар барнагашт ва бо ду фарзандам танҳо мондам.
“Фарзанди калониам дар мактаби №12-и шаҳри Бохтар таҳсил мекунад. Ӯро маҷбур кардаанд, ки «пули китобҳоятро биёр» ва ман барои додани пули китоби фарзандам ва таъмини зиндагӣ ба кӯча баромада, талбандагӣ мекунам. Худам маъюбаму дар аробачаи маъюбӣ нишастаам». Гуфтааст, ҳамсуҳбати Фараж.
Ин дар ҳолест, ки баъд аз баста гардидани марзҳо бо Русия сафи бекорон дар Тоҷикистон зиёд гардид ва айни замон аксари шаҳрвандоне, ки ба мардикорӣ мерафтанд, наметавонанд зиндагиашонро пеш баранд, маҷбуранд даст ба корҳои сиёҳ бизананд.
Дар шаҳри Душанбе баъд аз таъйини Рустами Эмомалӣ ба шҳрдории Душанбе талбандаҳоро дар кучаҳо боздошта ба шуъбаҳои милиса мебаранд ва онҳоро ҷарима мекунанд.
Чанд рӯз қабл дар шабкаҳои иҷтимоӣ наворе нашр гардида буд, ки дида мешуд, ду корманди милиса як ҷавонро ба зур дошта мебаранд, дар аввал навишта буданд, ки ҷавононро ба хизмат мебаранд, пасон Вазорати корҳои дохили дар як изҳороташ гуфт, он ҷавон ба талбандагӣ машғул будааст.
