Бархе расонаҳои Эрону Афғонистон бо нашри чанд навори видеоӣ гуфтаанд, ки “Лашкари 88-и зиреҳӣ”-и Эрон дар марзи Афғонистон сафороӣ кардааст.
Инчунин рӯзномаи “Интихоб” дар истинод ба Саид Хатибзода, Сухангӯи Вазорати корҳои хориҷии Эрон гуфта буд, ки марзбонони эронӣ масъулият доранд, ки аз ҳар гуна тараддуди ғайриқонунӣ ҷилавгирӣ кунанд ва афзуда буд, “умедворем хештандории мо дар марзи Афғонистон боиси сӯи бардошти тарафи муқобил нашуда бошад.” Пеш аз ин бархе расонаҳои Афғонистон иттилоъ дода буданд, ки қарор аст Халилурраҳмон Ҳаққонӣ, сарпарасти Вазорати муҳоҷирати Толибон дар раъси як ҳайъат ба Эрон сафар кунад, то дар мавриди чолишҳои марбути паноҳҷӯёни афғонистонӣ ва танишҳои ба вуҷудомада дар яке аз минтақаҳои марзӣ бо мақомоти эронӣ гуфтугӯ кунад. Ахбори марбут ба наворҳо дар бораи шиддат гирифтани эҳтимоли афзоиши таҳдиди хатарҳо ва “ягонҳои зиреҳӣ(-и Эрон) дар ҳоли ҳаракат ба сӯйи марз барои муқобила бо Толибон” дар ҳоле расонаӣ мешаванд, ки хабаргузории донишҷӯёни Эрон “ISNA” гуфтааст, “бархе аз ин филмҳо марбут ба артиши Эрон набуд.” Гуфта мешавад, марзи Дуғорун, минтақае, ки дар моҳҳои ахир борҳо мавриди танишҳои марзбонони Толибон бо марзбонони Эрон шуда, дар 228 километрии ҷанубу шарқи Машҳади Эрон ҷойгир буда, ба қавли хабаргузории расмии Эрон “ИРНА“, пас аз танишҳои ахир фаъолияташро аз сар гирифта, рӯзона аз 4 то 4,5 ҳазор нафар ва ҳудуди 500 мошинҳои гаронвазни борбар ҳам байни ду кишвар тараддуд мекунанд.
