Як ҳафта қабл Эмомалӣ Раҳмон қарори Ҳукумат дар хусуси ёддошти тафоҳум оиди ҳамкорӣ миёни Додситонии кулли Тоҷикистон ва Додситонии кулли Эронро имзо кардааст.
Ба Юсуф Раҳмон, Прокурори генералии Ҷумҳурии Тоҷикистон дастур дода шудааст, ки ёддошти ҳамкориро имзо кунад ва дар сурати зарурат тағйиротеро, ки аҳамияти усулӣ надоранд, ворид намояд.
Вазорати умури хориҷии Тоҷикистон вазифадор гардидааст, ки бо ҷониби Эрон санаю ҷойи имзои санади мазкурро мувофиқа созад.
Сироҷиддин Муҳриддин, вазири умури хориҷии Тоҷикистон чанде пеш Эронро кишвари дӯст хонда буд, ки бо Тоҷикистон муштаракоти зиёде дораду нахустин шуда, Истиқлолияти кишварро эътироф намуд. Ӯ афзуда буд, то воқеаҳои моҳи сентябри соли 2015 дар муносиботи Тоҷикистону Эрон дар ҳамаи бахшҳо ягон мушкил вуҷуд надошт.
Ба гуфтаи Вазири умури хориҷии Тоҷикистон баъзе мушкилиҳои сиёсӣ байни ин ду кишвар дар пайи он ба вуҷуд омаданд, ки гӯё бархе гурӯҳҳои сиёсию молиявии Эрон ҲНИТ-ро, ки дар Тоҷикистон террористӣ эълон шудааст, дастгирӣ карданд.
Чанде пеш дар ҳамаи шабакаҳои телевизионии Тоҷикистон, филме бо номи “Хиёнат” нашр гардида буд, дар ин филм гуфта мешавад, ки кишвари барои мо маълум ба ҷавонони тоҷик омӯзишҳои низомӣ ва террористӣ медодааст, то алайҳи ҳукумати ин кишвар иқдом кунанд. Онҳое, ки ин филмро тамошо карданд, ҳамон лаҳза пай бурданд, ки аз мақсад аз ибораи “кишвари ба мо тоҷикон маълум” давлати Ҷумҳурии исломии Эрон мебошад.
Алии Рабеӣ, сухангӯи давлати Эрон дар вокуниш ба филми Хиёнат гуфта буд: Мо муҳтавои филм ва ё нияти созандагони номаълуми онро бар асоси тафсирҳои расонаӣ қазоват намекунем. Эрон ва Тоҷикистон як рӯҳ дар ду бадани ҷуғрофиёӣ ҳастанд. Мо муттаҳид ба олитарин сатҳи эҳтиром ба ҳукумати мустақил ва роҳу равиши зиндагӣ дар кишвари Тоҷикистон ҳастем.
