Шаҳбоз Шариф, бародари Муҳаммад Навоз Шариф дубора Нахуствазири Покистон интихоб шуд.
Бино ба иттилои расонаҳо, 3-уми марти соли 2024, Маҷлиси миллии Покиситон (парлумон) пас аз раъйгирии вакилон эълон кард, ки Шаҳбоз Шариф, бародари Муҳаммад Навоз Шариф бо касби 201 раъй нахуствазири ҷадиди ин кишвар интихоб шудааст.
Ба қавли расонаҳо, дар ин раъйгирӣ байни вакилони парлумони Покистон рақиби Шаҳбоз Шариф намояндаи Шӯрои иттиҳоди суннӣ Умар Айюб буд, ки аз ҳаводорони Имрон Хон гуфта мешавад. Ӯ дар ин рақобат 92 раъй ба даст овардааст.
Умар Айюб номзади интихобии Имрон Хон буд. 15-уми феврал ба расонаҳо гуфта, ки Имрон Хон, раҳбари Ҳизби таҳрики инсофи Покистон Умар Айюб Хонро ба унвони номзади мақоми нахуствазирии Покистон аз байни ҳамҳизбонаш интихоб кардааст.
8-уми феврали соли 2024 интихоботи маҷлиси миллии Покистон ва иёлатҳои он баргузор шуда буд. Дар ин интихобот бо вуҷуди он ки мақомоти ин кишвар Ҳизби таҳрики инсофи Покистон бо роҳбарии Имрон Хонро аз ширкат кардан дар он маҳрум карда буданд, вале номзадҳои он ба сурати мустақил вориди интихобот шуда, наздик ба 100 курсии парлумонро соҳиб гардиданд.
Гуфта мешавад, баъд аз баргузории ин интихоботи парлумонӣ сару садоҳои зиёде дар бораи вуҷуд доштани тақаллуб дар сандуқҳои ба вуҷуд омада, мардумони зиёде ба натиҷаҳои эълоншуда эътироз карданд. Ҳатто бархе кормандони баландпояи Ситоди баргузории инхобот ҳам ба ҷамъи эътирозгарон пайваста гуфта буданд, ки ин интихобот ношаффоф ва пур аз тақаллуб буд.
