Имрӯз, 1-уми август Сулаймон Давлатзода, раиси Кумитаи дин, танзими анъана ва ҷашну мароисимҳои Тоҷикистон сабаби гарон будани нархи сафар ба зиёрати умра ва ё ҳаҷҷи фарзиро шарҳ дод.
Сулаймонзода имрӯз зимни нишасти матбуотии ниҳодаш сабаби аслии гарон будани нархҳо дар чунин сафарҳои ибодатиро ба билети ҳавопаймоҳҳо ва дигар хидматрасониҳо марбут донист.
Ӯ гуфт, дар Тоҷикистон ду ширкат барои бурдани мардум ба сафари умра фаъолият мекунад ва чун ин ширкатҳо бастаҳои иқтисодӣ ва VIP-ро барои хоҳишмандон пешниҳод мекунанд, аз ин ҳисоб нарх назар ба дигар кишварҳо фарқ мекунад.
Вале касоне, ки то имрӯз бо ширкатҳои дохилӣ, ки мутааллиқ ба наздикони расиҷумҳур ҳастанд, ба умра сафар кардаанд, надидаанд, ки ин сафари ибодатиро бо он нархи гароне, ки пардохт мекунанд, дар шакли VIP ва дар меҳмонхонаҳои 5-ситорагӣ гузаронида бошанд.
Шоҳидон мегӯянд, бо вуҷуди гарон будани нархи умра ва ҳаҷ шароит ҷавобгӯ нест, хобгоҳҳои арзон ва хеле дур аз Ҳарамро мегиранд, ки ба он нарх мувофиқ нестанд.
Тибқи гуфтаи Сулаймонзода, имсол аз Тоҷикистон беш аз 4,5 ҳазор нафар бо ҳадафи адо намудани ҳаҷҷи фарзӣ ба Арабистони Саудӣ сафар карданд, ки то имрӯз ҳамаи онҳо баргаштанд. Вале ӯ афзуд, ки 4 нафар аз ҳоҷиёни тоҷик дар ин сафар дар Маккаи Мукаррама аз дунё даргузаштанд ва ҳамонҷо дафн шуданд.
Мувофиқи эълони расмӣ, нархи ҳаҷҷи фарзӣ имсол барои як анфар 59 ҳазор сомонӣ муайян гардида буд. Вале бархе сокинон пештар ба Azda tv гуфта буданд, ки ин нархи расмӣ асту пардохтҳое дигаре низ вуҷуд дорад, ки мақомот онро эълон намекунанд. “Масалан аз ҷамоати деҳот шуруъ карда, то идораҳои ноҳиявӣ ва вилоятӣ аз касоне, ки нияти ҳаҷ доранд пеш аз сафар барои ободкорӣ маблағ меситонанд, ки он дар ҳеч ҷое навишта нашудааст.”, – гуфт як зоир.
