Вазири адлияи Тоҷикистон бемор будани маҳбуси сиёсӣ Маҳмадалӣ Ҳаит дар зиндонро таъйид карда, гуфт: “чораҳои зарурӣ андешида шуд, ки саломатияш барқарор шавад.”
12-июли соли ҷорӣ Музаффар Ашӯриён тасдиқ кард, ки наздикони Маҳмадалӣ Ҳаит барои саломатии ӯ ба мақомот муроҷиат карданд, аммо вазъи саломатии ӯро пурра шарҳ надод.
Ашӯриён таъкид кард,” тамоми чораҳо аз ҷониби хоҳ муассисаи тиббии худи Сарраёсат ва (хоҳ) мутахассисон аз берун нисбати ҳарду (Маҳмадалӣ Ҳаит ва Маҳмурод Одинаев) ҳам сари вақт даъват карда мешаванд.”
Вазири адлияи Тоҷикистон дар бораи сатҳи бемории онҳо шарҳ надод, вале иловатан афзуд, “агар ягон зарурат бошад, (боз) мутахассисон даъват карда шуда, барои саломатиро барқарор кардан ҳама чораҳоро меандешанд.”
Аммо дар мавриди муроҷиати Маҳмадалӣ Ҳаит барои гузаронидан ба ҷойи дигар гуфт, ин дархости ӯ қонеъ карда нашуд. Ашӯриён дар мавриди ради ин дархости вай афзуд, ҷойи нигаҳдории ӯ тибқи талаботи қонун ҳалу фасл шудааст. “Ҳар шахс наметавонад бо шахси дилхоҳаш якҷо нигаҳдорӣ карда шавад. Зеро он чизе, ки ҳаст дар доираи талаботи қонун ҳал шудааст.”
Пайвандони Маҳмадалӣ Ҳаит рӯзи 22-юми май бо ӯ дар СИЗО-и рақами яки шаҳри Душанбе мулоқот доштаанд. Савринисо Ҷӯрабекова, ҳамсари Маҳмадалӣ Ҳаит, баъд аз вохӯрӣ бо ӯ гуфт, ки шавҳараш аз масъулони Сарраёсати иҷрои ҷазои ҷиноии Вазорати адлияи кишвар чанд талаб карда, аз ҷумла хоста буд, ки ӯро бо Саидумар Ҳусайнӣ, муовини дигари зиндонии раиси Ҳизби наҳзати исломии Тоҷикистон (ҲНИТ) ҳамроҳ кунанд. Зеро ӯ бо нафаре ҳамроҳ карда шудааст, ки дар қатли ду зан муҷрим дониста мешавад ва ҳамеша бо баҳонаҳое тавтиа кардан мехостааст. Аммо ин дархости Маҳмадалӣ Ҳаит аз ҷониби мақомти Сарраёсати иҷрои ҷазои ҷиноятӣ (СИҶҶ)-и Тоҷикистон рад шуд.
Маврид ба ёдоварист, ки Маҳмадалӣ Ҳаитро мақомоти Тоҷикистон ҳамроҳ бо дигар аъзоёни ҲНИТ соли 2015 боздошт ва соли 2016 бо 14 моддаи Кодекси ҷиноятии Тоҷикистон гунаҳкор дониста, паси дарҳои баста барои якумра аз озодӣ маҳрум карданд.
Созмони Миллали Муттаҳид ва чандин созмонҳои байналмиллалии ҳомии ҳуқуқи башар аз ҳукумати Тоҷикистон озодии аъзоёни ҲНИТ, махсусан озодии бечуну чарои Маҳмадлӣ Ҳаитро талаб карданд, аммо ҳукумати кишвар ба дархости ин созмонҳои ҳуқуқӣ ҷавоби рад дод.
Чанде пеш созмони ҳомии ҳуқуқи зиндониёни сиёсӣ “Freedom Now” дар суҳбат бо “Аздо тв” иброз дошт, ки ҳамроҳ бо созмони “Ҳоган Ловеллс” (Hogan Lovells) ба Кумитаи ҳуқуқи башари СММ дар масъалаи поймол шудани ҳуқуқи озодии Маҳмадалӣ Ҳаит аз ҷониби мақомдорони Тоҷикистон шикоят бурдаанд, ҳамзамон талаб намуданд, ки ин Кумита дар мавриди он ки Ҳукумати Тоҷикистон бо зиндонӣ кардани Маҳмадалӣ Ҳаит уҳдадориҳои худро дар назди Паймони байналмилалӣ оид ба ҳуқуқҳои шаҳрвандӣ ва сиёсӣ вайрон кардааст, чораандешӣ кунад.
Дар баробари ин, “Freedom Now” аз Кумитаи СММ хоста, ки бори дигар озодии бидуни қайду шарти Маҳмадалӣ Ҳаитро аз Ҳукумати Тоҷикистон талаб кунад.
