Вазорати корҳои дохилаи Тоҷикистон рӯзи 1-уми феврал дар як хабар аз боздошт шудани ҷавони 21 сола хабар дод. Ин ҷавон Айниддин Давлятов ном дошта, бо иттиҳоми қасди одамкушӣ муттаҳам мешавад.
Тибқи иттилои баёнияи расмии Раёсати ВКД-и Душанбе Айниддин Давлятови 21-сола ба сабаби хусумати шахсӣ ба Музаффар Имомоназаров декани бахши менеҷменти байналмилалии Донишгоҳи технологии Тоҷикистон ба шиками ӯ корд зада, сахт захмӣ кардааст.
Дар баёнияи расмии раёсати ВКД-и шаҳри Душанбе сабаби сар задани ин ҳолатро чунин шарҳ додаанд:
“Давлятов Айниддин аз он ки падараш аз нахондану қарздории ӯ аз имтиҳонҳо тавассути декани факултет огоҳ шуда, ӯро сарзаниш кардааст нақшаи аз ҳаёт маҳрум сохтани деканро тарҳрезӣ намудааст. Бо ин мақсад, санаи 28-уми январи соли ҷорӣ бо корд мусаллаҳ гашта, декани факултети худро дар назди утоқи кориаш бо корд захмӣ карда, аз ҷойи ҳодиса фирор мекунад.”
Дар ин маврид назари волидайн ва ё вакили дифои муттаҳам ба ҷиноят маълум нест. Додситонӣ ба зидди Айниддин Давлятов бо иттиҳоми суиқасд ва ё талош барои одамкушӣ парванда боз кардааст ва дар сурати собит шудани иттиҳом мумкин аст ӯро аз 8 то ба 15 соли зиндон маҳкум кунанд.
Бино ба иттилои Радиои Озодӣ айни замон омӯзгор дар бемористон муолиҷа мегирад.
Як устоди ин донишгоҳ дар суҳбат бо Радиои Озодӣ гуфт, ки Музаффар Имомназаров дар корпуси 5-уми беморхонаи Қарияи Боло бистарӣ аст ва ӯро чанд маротиба ҷарроҳӣ намуданд ва айни замон вазъи саломатиаш муътадил гуфта мешавад.
Музаффар Имомназаров, дотсент, номзади улуми иқтисодӣ буда, аз 1-уми феврали соли 2019 декани факултаи менеҷменти байнулмилалӣ ва маркетинг мебошад.
