Эмомалӣ Раҳмон, президенти Тоҷикистон дар суҳбат бо Маҳмуд Шоҳ Муҳмуд Қурайшӣ, вазири корҳои хориҷаи Покистон таъкид кард, ки тоҷикони Афғонистон 46 дарсад аз сокинони ин кишварро ташкил медиҳанд, бояд дар ҳукумати оянда ҷойгоҳи шоиста дошта бошанд.
Сомонаи президент, ки машруҳи мулоқоти Эмомалӣ Раҳмон бо Маҳмуд Шоҳ Маҳмуд Қурайшӣ, вазири корҳои хориҷаи Покистонро нашр кардааст, менависад: “Ҷумҳурии Тоҷикистон таъкид намуд, ки барои ҳалли фаврии мушкилоти сиёсиву амниятии кишвари ҳамсоя бояд ҳарчи тезтар як Ҳукумати фарогири инклюзивӣ бо иштироки ҳамаи ақалиятҳои миллӣ пеш аз ҳама тоҷикони Афғонистон, ки зиёда аз 46 фоизи мардуми ин кишварро ташкил медиҳанд, таъсис дода шавад.”
Эмомалӣ Раҳмон таъкид кардааст, ки “Тоҷикистон ҳеҷ гуна ҳукумати дигарро, ки дар ин кишвар бо роҳи зулму таъқиб, бе дарназардошти мавқеъи кулли мардуми Афгонистон, бахусус тамоми ақаллиятҳои миллии он таъсис дода мешавад, эътироф нахоҳад кард.”
Пеш аз ин Паймони Миллии Тоҷикистон, ки як эътилофи мухолифин дар хориҷи кишвар аст, бо нашри як баёни аз Ҳукумати Тоҷикистон хоста буд, Ҳукумати Тоҷикистонро лозим аст, ки барои таъмини манфиатҳои миллӣ ва давлатии кишварамон, инчунин, барои расидан ба як тавозуни сиёсии муносиб дар кишвари ҳамсоя, ки битавонад манфиатҳо ва ҳуқуқи ҳамаи миллатҳо ва қавмиятҳои Афғонистонро таъмин намояд, як силсила иқдомҳои ҷиддиро амалӣ намояд. Аз ҷумла:
– Бо ҳадафи мусоидат ба як сулҳи пойдор дар кишвари ҳамсоя, ба таври ошкор ба Тоҷикистон даъват кардан ва пазироӣ аз шахсиятҳои сиёсӣ ва роҳбарони мардумии Афғонистон, ки имрӯзҳо маҷбур ба ҳиҷрат шудаанд ва дар кишварҳои гуногун ба сар мебаранд. Ба хусус аз шахсиятҳое, ки дар ростои ормонҳои миллии мо ва мардуми Афғонистон пайкор мекунанд;
– Бозидани нақши ҷиддитар ва боҷуръаттар дар ҳимоят аз манфиатҳои миллӣ дар сатҳи минтақа;
– Иқдомҳои мушаххас ва ройзаниҳо бо кившарҳои минтақа ва нерӯҳои зирабти Афғонистон барои кумак ҷиҳати расидан ба як ҳалли сиёсии муносиб, ки манфиатҳои милли мо низ таъмин гардад.
Инчунин Ҳизби демократи Тоҷикистон бо нашри як изҳорот аз Ҳукумати Тоҷикистон талаб карда буд, ки “дари сафоратхонаҳои давлатҳоеро, ки ин низоми бешарафи инсониро дар Афғонистон пуштибонӣ мекунанд, бибандад. Давлатҳои Покистон, Арабистони Саудӣ ва Қатар ба ин гурӯҳи золим ёриҳои бевоситаи пуливу молӣ ва силоҳу муҳимоти ҷангӣ медиҳанд. Ҳамчунин ба ҳукуматҳое, ки ин низоми терористиро эътироф мекунанд, эътироз баён карда шавад.”
Толибон Покистонро хонаи дуввуми худ медонанд ва Исломобод, яке аз пуштибонони асосии ин ҳаракат дониста мешавад ва гуфта мешавад дар тасмимгириҳои Толибон дар ташкили ҳукумати ояндаи Афғонистон метавонад нақши арзандае бозӣ кунад.
