Сиёвуш Зуҳуров, муштзани тоҷик, ки дар ҳайъати тимми миллии олимпии Тоҷикистон ба Токио рафта буд, дар даври аввали Бозиҳои олимпӣ шикаст хӯрд.
Сиёвуш, ки 28 сол дорад, субҳи имрӯз бо натиҷаи 0:5 аз рақиби озаритабори фаронсавиаш Мурод Алиев дар вазни +91 кг, мағлуб шуд.
Дар риштаи бокс қаблан дар ин мусобиқот Шаббос Неъматуллоев дар даври аввал мағлуб гаштаву Баҳодур Усмонов ҳарифи узбекашро интизор аст.
Ҳамчунин дар Бозиҳои тобистонаи олимпии Токио – 2020 ҷудокорони тоҷик Сомон Маҳмадбеков, Акмал Муродов ва Комроншоҳи Устопириён низ ноком шуданд.
30-юми июл дар Токио ҷудокори тоҷик Темур Раҳимов дар вазни беш аз 100 кг бо Энди Гранда аз Куба қувваозмоӣ мекунад.
Аз варзишгарони тоҷик, шиноварон Анастасия Тюрина, Олимҷон Ишонов ва Илнур Аҳмадиев аз варзиши сабук вориди сабқат хоҳанд шуд.
Бозиҳои олимпии Токио-2020 рӯзи 23-юми июл оғоз шуда, то 8 августи соли ҷорӣ идома хоҳанд ёфт.
