Як гурӯҳ аз сокинони ноҳияи Сангвор (собиқ Тавилдара) аз он шикоят доранд, ки масъулон ба ҷои он ки мушкилоташонро ҳал кунанд, баракс, зиндагиашонро душвортар кардаанд.
Як сокини ин ноҳия, ки нахост номаш зикр шавад, дар сӯҳбат ба “Аздо тв” гуфт, зиндагӣ дар ин ноҳияи кӯҳии кишвар рӯз то рӯз душвортар мегардад.
Ба қавли ӯ, асосан зиндагии сокинони ноҳия аз ҳисоби чорводорӣ ва ҷамъи тиллову корҳои дигар мегузашт, аммо як ширкати чинӣ дар ноҳия ба ҷамъи тилло машғул шудааст ва дигар сокинонро намегузорад ба ин кор даст бизананд.
Агар ҳар кӣ тилло ҷамъ кунад ҳангоми фурӯхтан ӯро андози зиёд мебанданд, ки хеле кори ҷамъи тиллоро душвор мекунад. Ин мушкилот сабаб шуда, ки аксари сокинон ба Русия барои кор раванд, “ҳоло аз ҳар хонае то 2-3 нафар дар муҳоҷиратанд”, мегӯяд ҳамсӯҳбати мо.
Ҳамзамон ҳамсӯҳбати мо гуфт, Шукурҷон Зуҳуров, собиқ раиси Маҷлиси намояндагони Маҷлиси Олии Тоҷикистон дар ноҳия меҳмонхонае сохтааст, ки макони кайфу сафои кормандони КДАМ ва пулис гаштааст ва ҳар коре дилашон бихоҳад мекунанд.
Дар идомаи сӯҳбаташ гуфт: “Кормандони КДАМ ва пулису дигар мақомот аз номи Президент ва Ҳукумат қонуншиканиҳои зиёд мекунанд, ба мардум ҷабр мекунанд, аммо касе нест пеши роҳи онҳоро бигирад, аз ҳукумати кишвар талаб мекунем, ки пеши роҳи мардуми қонуншикан дар либоси коргари Ҳукуматро бигирад, инҳо обрӯ ва эътимоди Президент ва Ҳукумати мамлакатро дар назди мардум коста кардаанд”.
Ин манбаи “Аздо тв” аз гаронии нарху наво дар ноҳия шикоят намуда, гуфт, як халта орде, ки дар пойтахт 250-270 сомонӣ бошад дар ин ноҳия 315-330 сомонӣ аст ва равғане, ки дар Душанбе 80-90 сомонӣ бошад дар ноҳияи Сангвор (Тавилдара) 120 ва болотар аз он фурӯхта мешавад.
Сабаби гаронии нарху наворо дар ин ноҳия ба роҳҳои нотамому мушкилгузар рабт дода мегӯяд, ки роҳи ободе надоранд, ки тоҷирон бехавф ба Душанбе ва дигар навоҳӣ бираванд.
Манбаъ дар охир мегӯяд, соли 2018 вақте, ки Эмомалӣ Раҳмон ба ин ноҳия сафар дошт, намояндагони ҳукумат пул ё ҳамон купруки қишлоқи Ёзғандро канда ба деҳаи Гурумбак бурда гузоштанд, ки Раҳмон аз онҷо бояд мегузашт. Ва ҳоло он қишлоқ роҳи ободе надорад ва ҳамон як купруке, ки дошт он ҳам канда шуд.
Ин назари чанде аз сокинони ноҳияи мазкур буд, ки ба дасти “Аздо тв” расид, аммо дар мавриди ҷой доштани чунин мушкилот то ҳол назари худи мақомоти ноҳия дастрас нест. Дар сурати дастрас гаридани вокунеше аз ҷониби масъулони ноҳия “Аздо тв” онро нашр хоҳад кард.
