Владимир Путин ва Эмомалӣ Раҳмон рӯзи 8-уми май дар Кохи Кремл мулоқот анҷом доданд. Дар ин мулоқот Эмомалӣ Раҳмон аз вазъи амнияти Афғонистон пас аз хуруҷи нерӯҳои низомии Амрико аз ин кишвар ибрози нигаронӣ намуда, хостори ёрӣ дар таҳкими ҳифзи марзи Тоҷикистон бо кишвар шудааст. Путин низ ба вазъ дар Афғонистон ишора намуда гуфт, ки вазъи Афғонистон нигарониҳоеро дар Тоҷикистон ба вуҷуд овардааст.
Президенти Русия дар идомаи суҳбаташ иброз дошт, ки “масъалаҳои амниятӣ дар минтақа дар робита ба ҳодисаҳое, ки дар Афғонистон рӯх медиҳанд, хеле муҳиманд”.
Дар ин суҳбат Путин қайд намуд, ки Маскав барои дастгирии Душанбе дар ин самт ҳама корҳоро анҷом дода истодааст ва ба фаъолияти пойгоҳи низомии 201-и Русия дар Тоҷикистон ишора намуд.
“Мо барои таҳкими пойгоҳи низомии 201-и Русия ва тақвияти нерӯҳои мусаллаҳи Тоҷикистон кор намуда истодаем. Ҳамчунин дар ин самт як барномаи муштараку тӯлонӣ барои чанд сол таҳия шудааст ва мо ҳама корҳоро анҷом медиҳем, то ин барнома саривақт иҷро шавад.”- гуфт Президенти ФР.
Путин инчунин ба Раҳмон гуфт, ки Русия барои дастгирии Тоҷикистон дар давраи раёсати Созмони Ҳамкориҳои Шанхай (СҲШ) ҳама корҳои имконпазирро анҷом хоҳад дод.
Ҳамчунин Раҳмон зимни мулоқот бо Путин масъалаи муҳоҷирати меҳнатии шаҳрвандони Тоҷикистонро баррасӣ карда, ба зарурати бештар кардани “хатсайрҳои ҳавоӣ миёни ду кишвар” таъкид кардааст.
Дар идома Президенти Русия гуфт, ки Русия ва Тоҷикистон метавонанд ҳаҷми савдоро ба сатҳи пеш аз пандемия расонанд.
Ёдовар мешавем, ки Эмомалӣ Раҳмон барои иштирок дар паради бахшида ба 76-солгарди Ҷашни Ғалаба озими Маскав шуд. Раҳмон танҳо раҳбари кишваре буд, ки Владимир Путин президенти Русияро рӯзи 9-уми май дар Иди Ғалаба дар Маскав ҳамроҳӣ мекард.
Ҳангоми пахши зинда аз гашти низомӣ дар Маскав, барандаи Шабакаи аввали телевизиони Русия вақти муаррифии Эмомалӣ Раҳмон дар Майдони Сурх иштибоҳан ӯро “Эммануэл Раҳмон” ном бурд, вале зуд хатои худро ислоҳ кард.
Чанде аз расонаҳо ин қисмати муаррифии Раҳмонро буридаанд ва ё бо садои дигаре пӯшондаанд.
Аз ҷумла ширкати алюминийи тоҷик (Талко) низ лаҳзаи муаррифии Эмомалӣ Раҳмонро дар Майдони Сурх дар саҳифаи расмии худ дар Ютуб ҷой дода, аммо лаҳзаи хатои барандаро бо садои дигар иваз кардааст.
Бино ба иттилои Радиои Озодӣ дар гашти низомӣ дар Маскав беш аз 12 ҳазор низомӣ бо 190 техника ва 76 ҳавопаймои низомӣ иштирок намудаанд.
