Фаъолони тоҷик дар шабакаҳои иҷтимоӣ аз муштариёни ширкати мобилии “Мегафон” даъват кардаанд, ки ин ширкатро таҳрим кунанд ва аз симкорҳояш дигар истифода накунанд.
Ин иқдоми фаъолон ҳам дар пайи қазияи латукӯби бераҳмонаи зани ҷавон – Мадина Маҳмадҷонова аз ҷониби Азиза Давлатова, ҳамсари Лутфулло Давлатов – як масъули ин ширкат, ки дар ҷомеа сару садоҳои зиёдеро барпо кард, гирифта шудааст.
Қазияи Мадина Муҳаммадҷонова ҳафтаи охир доғ буд. Мувофиқи хабарҳои расида, ин зани ҷавон пас аз латукӯб шудан дар ҳолати беҳушӣ (кома) қарор дошта, то баҳол ба худ намомада аст ва тақдири ояндаашҳам номуайян гуфта мешавад. Шаҳбоз Абдуразақов, фаъол дар шабакаҳои иҷтимоӣ ва бародари коргардони шинохтаи тоҷик Барзу Абдуразоқов дар ин бора дар саҳифаи фейсбукаш вокуниш нишон дода, аз муштариёни “Мегафон” дар Тоҷокистон даъват карда аст, ки ин ширкатро бойкот кунанд.
Абдуразоқов менависад, ки магар бойкот эълон кардани ширкате, ки аз озори ҷинсии яке аз раҳбаронаш чашм пӯшидааст, кори сахт аст?
“Дар давоми чанд рӯз флешмоб ташкил кунед ва симкортҳои ин шикратро ба ширкати дигар иваз кунед. Бо истифода аз хидматрасониҳои ин ширкат шумо касонеро, ки ин ҳама аъмоли зиштро рӯпӯш кардаанд, аз ҷиҳати молиявӣ дастгирӣ мекунед”, таъкид мекунад ӯ.
Шаҳбоз Абдуразоқов ҳамчунин навишта, ки “Аз рӯи он чизе ки ман дар бахши тоҷикии ФБ тайи ин се-чаҳор рӯз хондаам, чунин як гапе ҳаст ҳаст, ки ин мардак дар ширкати “Мегафон” яке аз вазифаҳои баландро ишғол мекунад.
Ин мардак солҳост, ки зердастонашро озори ҷинсӣ мекарда. Бархе аз қурбониёни ин таъқиб маҷбур шуданд, ки ҷои корашонро тарк кунанд, баъзеи дигар бо дили нохоҳам розӣ шудаанд ва баъзеҳо ихтиёран”.
Гуфта мешавад, ки Азиза Давлатова, ҳамсари Лутфулло Давлатов дар охирҳои моҳи август маъшуқаи ҳамсараш, Мадина Муҳаммадҷоноваро дуздида аз шаҳр берун бурда аст. Ин зани ҷавон то ҳаде латукӯб ва шиканҷа шудааст, ки муддати 73 рӯз аст ба худ намада.
Бо вуҷуди ин пештар мақомот қазияи мазкурро баъд аз тафтиш пӯшонд ва мувофиқи Қонуни Тоҷикистон “Дар бораи авф” аз 7 сентябри соли ҷорӣ тафтиши парвандаро қатъ кард. Танҳо пас аз вокунинши тунди фаъолон дар шабакаҳои иҷтимоӣ шаҳрдори Душанбе Рустами Эмомалӣ шахсан ба қазияи латукӯби бераҳмонаи Мадина ва ба ҷавобгарӣ кашидани шахси гунаҳкор дахолат кард ва таҳқиқи қазия аз нав гирифта шуд.
Назари муттаҳамон ва ё вакили мудофеи онҳо ба ин қазия то ҳол маълум нест. Додситони куллли Тоҷикистон дар шарҳи қазия рӯзи 1-уми ноябр гуфт, ки дар қазияи латукӯби Мадина Муҳаммадҷонов ду нафар, Азиза Давлятова ва шавҳараш Лутфулло Давлятов гумонбар дониста мешаванд. Нисбати онҳо бар асоси ду банди Кодекси ҷиноӣ парванда боз шудааст ва ба онҳо аз 7 то 15 соли зиндон таҳдид мекунад.
