Мунтахаби миллии Эрон дар Ҷоми ҷаҳонии футбол-2022 дар мубоқили мунтахаби миллии Уэлс ғолиб омад ва ин пирӯзӣ шодии мардумро ба ҳамроҳ дошт.
Имрӯз, 25-уми ноябри соли 2022 мунтахаби миллии футболи Эрон дар Ҷоми ҷаҳонии футбол-2022 дар муқобили тими миллии мунтахаби футболи Уэлс дар Қатар ба ҳисоби 2:0 пирӯз шуд.
Ин бозӣ дар байни эрониҳо, новобаста аз мувофиқ ва ё мухолиф будан бо низоми ҷумҳурии исломӣ, ки дар ин шабу рӯз нишебу фарозҳои зиёдеро бо ҳам таҷриба мекунанд, як навъ иттиҳодеро ба вуҷуд оварда, дида мешавад, ки ҳама бо ҳам бо рақсу пойкӯбӣ аз он истиқбол мекунанд.
Дар саҳфаҳои Фейсбук ва дигар шабакаҳои иҷтимоӣ низ дида мешавад, ки дар баробари эрониҳо тоҷикистониҳои зиёде низ бо вуҷуди мухолиф ва мувофиқ будан бо низоми ҷумҳурии исломӣ аз ин бурди тими миллии Эрон бо шеваҳои мухталиф хушҳолӣ мекунанд.
Гуфта мешавад, ин пирӯзии мунтахаби миллии футболи Эрон дар дуввумин даври бозиҳои худ дар Қатар он ҳам дар муқобили яке аз тимҳои қавии кишварҳои ғарбӣ ғолибияти боарзиш маҳсуб мешуд.
Инглистон дар даври нахусти ин бозиҳо Эронро ба ҳисоби 6:2 шикаст дода буд ва акнун мухлисони мунтахаби миллии футболи Эрон ин голҳоро, ки дар дақиқаҳои охири бозӣ дар муқобили Уэлс дарвозаро рахна карда, ба ҳадаф расиданд, натанҳо пирӯзӣ, балки ба навъе тоза кардани қисме аз аламҳои Инглистон ҳам медонанд.
Ин бозии тими Эрон ва Уэлс, ки дар даври дувуми гурӯҳи В анҷом шуд, дар варзишгоҳи “Аҳмад бен Алӣ”-и шаҳри Ар-Райёни Қатар баргузор гашт.
