Шоҳида Маҳмадҷонавора ба СИЗО интиқол доданд

Идимоҳ Маҳмадҷонова бо гиря гуфтааст, ки барои дидорбинӣ бо духтараш ҳуҷҷате, ки иҷозати воридшуданро диҳад лозим аст. Чун бемор аст ҳоло онро натавонистааст бигирад.

Хонум Маҳмадҷонава то ба СИЗО интиқол ёфтанаш, дар боздоштгоҳи муваққатии Раёсати корҳои дохилии шаҳри Душанбе нигаҳдорӣ мешуд.

Шоҳида Маҳмадҷонова модари блогери тоҷики муқими Олмон Шерзод Маҳмадҷонов, маъруф ба Абдураҳмон-09 аст, ки бо даъвати мақомоти корҳои дохилӣ дар шаҳри Ваҳадат рӯзи 3-юми феврали соли ҷорӣ ба шӯъбаи ВКД дар ин шаҳр ҳозир шуд ва аз ҳамон ҷо бедарак гардид ва пас аз гузашти 6 рӯз бо фишори ҷомеаи шаҳрвандӣ ва расонаҳо Вазорати корҳои дохилӣ маҷбур шуд, ки боздошти ӯро эътироф кунад.

Шоми 8-уми феврал ВКД-и Тоҷикистон бо нашри як изҳорот боздошти Шоҳида Маҳмадҷоноваро тасдиқ карда, хабар дода буд, ки нисбати ӯ “тибқи талаботи моддаи 307 иловаи 3 қисми 2 (ташкили фаъолияти ташкилоти экстремистӣ (ифротгароӣ)) Кодекси Ҷиноятии Ҷумҳурии Тоҷикистон пешбинигардида, парвандаи ҷиноятӣ оғоз карда шуда, номбурда ба ҳабси пешакӣ гирифта шудааст.”

Ҳамчунин ӯро мақомот дар ҳамкорӣ бо “Гурӯҳи 24” гумонбар дониста буданд. Дар посух ба ин иттиҳомот Ҳаракати сиёсии “Гурӯҳи 24” иддаои мақомоти корҳои дохилии Тоҷикистон дар бораи узв ин гурӯҳ қаламдод кардани Шоҳида Маҳмадҷоноваро рад карда, боздошти ӯро ҷиноят болои ҷиноят хонда буд.

Наздиконаш низ ин иттиҳомотро рад мекунанд ва мегӯянд, мақомот бо боздошти Шоҳида Маҳмадҷонова мехоҳанд писараш, Шерзод Маҳмадҷонов, маъруф ба Абдурраҳмон-09 дигар бар зидди ҳукумат чизе нагӯяд ва ба Тоҷикистон баргардад.

Шоҳида Маҳмадҷонава пас аз 18 соли фаъолият ҳамчун табиб дар шаҳри Ваҳдат 3-юми январи соли 2020 зери фишори мақомот аризаи “бо хоҳиши худ” аз кор рафтанашро имзо карда буд.