Шоми сешанбе дар ду таркиши ҷудогона дар шаҳри Кобул пойтахти Афғонистон ҳадди ақал 10 ғайринизомӣ кушта ва 12 тани дигар маҷрӯҳ шуданд.
Бино ба иттилои “Аriananews” Ҳомид Рошан, муовини сухангӯи Вазорати корҳои дохилии Афғонистон ба расонаҳо гуфта, ки таркиши аввалӣ тахминан соати 19:00 дар назди масҷиди “Аҳлибайт” наздик ба хонаи Муҳаммад Муҳақиқ, мушовири аршади умури амниятӣ ва сиёсии раисҷумҳури Афғонистон рух додааст.
Муовини сухангӯи Вазорати корҳои дохилӣ аз чунин як таркиши дигар низ хабар дод.
Ба иттилои манбаъ, таркиши дуввумӣ тахминан соатҳои 20:00 ба вақти маҳаллӣ дар минтақаи сеюми амниятии шаҳри Кобул дар наздикии як дорухона рух дод. Бобмҳо дар ин ду таркиш дар мошинҳои навъи “Костр лени” ҷогузорӣ шуда буд.
Муовини сухангӯи Вазорати дохилаи Афғонистон талафоти таркиши дуюмиро таъйид карда, вале шумори онро ба расонаҳо шарҳ надод.
То ҳанӯз масъулияти ин ду таркишро шахсе ё гурӯҳе бар дӯш нагирифтааст.
