Бино ба иттилои расмӣ, байни шаҳри Душанбе ва шаҳри Доҳаи Қатар парвози мустақим боз шудааст.
Шуруъ аз рӯзи 28-уми ноябри соли ҷорӣ ширкати ҳавопаймоии “Сомон Эйр” парвозҳои мунтазамро аз Душанбе ба пойтахти Қатар, шаҳри Доҳа оғоз кард. Парвозҳо ҳафтае як маротиба дар рӯзи чоршанбе сурат хоҳанд гирифт. Дар ин бора дафтари матбуоти ширкати “Сомон Эйр” хабар дода аст.
Гуфта мешавад, ки парвозҳо аз Душанбе ба самти Қатар дар рӯзҳои зикшуда соати 09:00 ва аз Доҳа ба самти Душанбе соати 12:20 (бо вақти маҳаллӣ) анҷом хоҳад ёфт. Давомнокии парвоз ба самти Доҳа 3 соату 50 дақиқа ва дар бозгашт ба сӯи Душанбе 3 соату 40 дақиқа навишта шудааст. Ин ширкати ҳавлпаймоии Тоҷикистон мегӯяд, дар ин хатсайр барои парвозҳо аз ҳавопаймои “Boeing” истифода хоҳад шуд.
Ҳамчунин дар шарҳи хабар гуфта шуда, ки хатсайри Душанбе-Доҳа-Душанбе бо дастури Президент, Эмомалӣ Раҳмон кушода шуда, Агентии авиатсияи граждании назди Ҳукумати Ҷумҳурии Тоҷикистон онро анҷом медиҳад. Дар хабар гуфта мешавад, ин масир натиҷаи иҷрои созишномае байни давлатҳои Тоҷикистон ва Қатар буд, ки соли 2017 ба имзо расида буд.
