Як мақоми баландпояи Гурӯҳи Толибон ба хабаргузории Садои Амрико гуфта, ки намояндагони ин гурӯҳ дар нишасти Истанбул ба шарте иштирок мекунанд, ки ин нишаст кӯтоҳ бошад, иштирокдорони он шомили тасмимгирӣ дар мавриди мавзӯоти муҳим набошад; ва ҳузури Толибон дар сатҳи поёнтар бошад.
Ин мақоми Толибон, ки нахост номаш ифшо шавад, афзуда, ки “Роҳбари мо пешниҳод карда, ки нишасти Истанбул набояд аз се рӯз зиёд тӯл бикашад.”
Як мақоми баландпояи дигари Толибон низ ин шартҳои Толибонро барои ширкат дар ҳамоиши Истанбул тасдиқ кард.
Қарор буд, нишасти Истанбул бо пешниҳоди ИМА рӯзи 16 апрел оғоз ёфта, дар ҳамбастагии Туркия, Қатар ва СММ баргузор шавад ва 10 рӯз идома ёбад.
Аммо Толибон моҳи гузашта гуфта буданд, ки ҷузъиёти мулоқот бо онҳо гуфта нашудааст ва бо ин далел онҳо дар нишаст ширкат нахоҳанд кард.
Баъдтар низ бо баҳонаи дигаре аз ҳузур дар ин нишаст худро канор кашиданд. Толибон мегӯянд, то замоне, ки нерӯҳои хориҷӣ дар Афғонистон ҳузур доранд, онҳо дар ҳеч нишасте, ки дар мавриди Афғонистон тасмим гирифта мешавад, ширкат нахоҳанд кард.
Ин мақоми аршади Толибон ҳамчунин гуфт, ки раҳбарони гурӯҳ ҷонибдори ширкат дар нишасти Истанбул набуданд, аммо пас аз дархости Покистон ва Қатар тасмим гирифтанд, ки пеш гузоштани баъзе шартҳо ширкат кунанд.
Ин мақоми Толибон дар мавриди тасмими оташбас аз ҷониби ин гурӯҳ гуфта, ки Толибон дар ҳоли ҳозир оташбасро эълом нахоҳад кард ва ҳамчуннин дар музокироти байниафғонӣ дар мавирди оташбас тасмим гирифта намешавад.
