Сироҷиддин Муҳриддин, вазири корҳои хориҷии Тоҷикистон рӯзи 5-уми сентябр аз Маскав боздид ва бо Сергей Лавров, вазири корҳои хориҷии Русия гуфтушунид хоҳад кард. Дар ин бора ба расонаҳо намояндаи расмии Вазорати корҳои хориҷии Русия Мария Захарова хабар дод.
Ба гуфтаи Захарова, ин нишаст дар остонаи ҷашни истиқлоли Тоҷикистон баргузор гардида. Дар он ба ҳамкориҳои тиҷоративу иқтисодӣ, фарҳангиву гуманитарӣ, дифоъ, амният, сиёсати муҳоҷират, омодасозии кадрҳо, тадбирҳои муштарак дар заминаи амнияти биологӣ, аз ҷумла мушкилоти эпидемиологӣ ва ба мавзуи амнияти иттилоотӣ таваҷҷуҳи хосса дода мешавад.
Инчунин ҷонибҳо аз масъалаҳои мубрами минтақавӣ ва байналмилалӣ, аз ҷумла вазъи Афғонистон хоҳанд гуфт.
Захарова мегӯяд, ки Сироҷиддин Муҳриддин ва Сергей Лавров бояд иҷрои тавофуқҳоеро, ки дар мулоқотҳои ахири президентҳои Русия ва Тоҷикистон ҳосил шуда буданд, баррасӣ кунанд.
Дар доираи ин нишаст ба имзо расидани барномаи ҳамкорӣ миёни вазоратҳои корҳои хориҷии Русия ва Тоҷикистон барои солҳои 2022-2023 дар назар аст.
