Маҷмаи умумии Созмони Милали Муттаҳид (СММ) рӯзи чоршанбе, 12 октябр бо тасвиби қатъномае ба хоки Русия ҳамроҳ кардани заминҳои Украинаро ба расмият нашинохт ва онро маҳкум кард.
Дар нишасти рӯзи гузаштаи СММ ба Қатъномаи ба расмият нашинохтан ва маҳкумияти ҳамроҳ кардани заминҳои Украина ба хоки Русия, 143 кишвар раъйи мусбат, 5 кишвар раъйи зид ва 35 кишвари дигар бетарфиро интихоб карданд.
Кишварҳое ба монанди Ҳиндустон, Покистон, Чин бо шумули баъзе кишварҳои африқоӣ ва аксари кишварҳои собиқ Шӯравӣ, аз ҷумла Тоҷикистон, Қазоқистон, Қирғизистон, Узбекистон, Арманистон ва ғайра мавқеи бетарафиро интихоб кардаанд.
Худи Русия ва чор кишвари дигар: Белорусия, Кареяи Шимолӣ, Сурия ва Некарагуа ба ин Қатънома раъйи мухолиф доданд.
Маҷмаи умуми СММ бо тасвиби ин Қатънома иқдомоти ахири Русияро тибқи қавонини баналмилалӣ ғайримашруъ хондааз ҳама кишварҳо ва созмонҳои баналмилалӣ хост, ки заминҳои ишғол шудаии Украинаро ҳамчун хоки Русия ба расмият нашиносанд.
Инчунин ин ниҳоди бузурги байналмилалӣ аз Русия хост, ки фарвран ва бидуни қайду шарт тасмимҳои худро дар мавриди минтақаҳои Украина бекор кунад.
Аз оғози ҳамлаи Русия ба Украина ин бори чаҳорум аст, ки Маҷмаи умумии СММ алайҳи қарорҳои Русия қатънома қабул намуда, амалкардҳояшро маҳукм мекунад.
Ёдовар мешавем, ки Русия охири моҳи сентябр бо гузарондани ҳамапурсӣ расман чаҳор минтақаи Украина: Запороже, Херсон, Луганск ва Донетскро ба хоки худ ҳамроҳ кард.
Гуфта мешавад, ин иқдоми Русия баъд аз Ҷанги ҷаҳонии дуввум бузургтарин ҳамроҳкунии ғайриқонунии хоки як кишвар ба кишвари дигар ба ҳисоб меравад, ки он вокунишҳои шадиди Амрико ва кишварҳои ғарбӣ ва ҳатто баъзе муттаҳидони Маскавро дар пай дошт.
