Ширкати “Сомон Эйр” аз барқарор шудани парвозҳои доимӣ дар хатсайрҳои Душанбе-Қазон-Душанбе ва Хуҷанд-Новосибирск-Хуҷанд хабар дод.
“Asia- Plus” дар истинод ба дафтари матбуоти ширкати “Сомон Эйр” хабар медиҳад, ки аз 9-уми июни соли ҷорӣ парвозҳо дар ҳарду масир ҳафтае як маротиба, рӯзҳои панҷшанбе сурат мегиранд.
Вақти парвоз аз Душанбе ба Қазон соати 17:40 ва аз Қазон ба Душанбе соати 21:00 ба вақти маҳаллӣ муайян шудааст. Парвоз аз Хуҷанд ба Новосибирск соати 20:30 ва шаби ҷумъа соати 03:00 ба самти муқобил сурат хоҳад гирифт. Парвозҳо дар ҳавопаймоҳои Boeing 737-800 ва -900 анҷом дода мешаванд.
Гуфта мешавад, мусофироне, ки ба Русия парвоз мекунанд (ба истиснои шаҳрвандони Русия) бояд бо худ шаҳодатнома бо натиҷаи санҷиши манфии COVID-19, ки на дертар аз 48 соат пеш аз ворид шудан ба Русия дода шудааст, дошта бошанд.
