Рӯзҳои наздик Созмони Паймони Аҳдномаи Дастаҷамъӣ ба Тоҷикистон таҷҳизоти нави низомӣ медиҳад. Дар ин бора муовини Дабири кулли СПАД Валерий Семериков хабар дод.
Ба гуфтаи ӯ, рӯйхат ва ҳаҷми техникаҳои низомие, ки бояд ба Тоҷикистон дода шаванд, аллакай мувофиқа шудаанд ва ҳоло кишварҳои узв муҳокима доранд, ки барнома аз кадом манбаъҳо маблағгузорӣ мешавад.
Гуфта мешавад, додани ин таҷҳизоти низомӣ аз ҷониби кишварҳои Русия, Белорус ва Қазоқистон ва дар чорчӯби татбиқи “Нақшаи панҷсолаи таҳкими марзи Тоҷикистон бо Афғонистон” сурат мегирад, ки онро СПАД бо мақсади тақвияти амният дар минтақа иҷро мекунад.
Дар хабар дақиқ гуфта нашудааст, ин техникаҳои низомие, ки бояд ба Тоҷикистон дода шаванд, аз чӣ иборатанд. Вале ба назари коршиносон, ин техникаҳо метавонад аслиҳа ва таҷҳизоти марбути ҳифзи амният ва тақвияти марз бошанд.
Қаблан ҳам Тоҷикистон борҳо аз СПАД барои тақвияти амният ва ҳифзи марз бо Афғонистон дархости кумак карда буд. Агарчи муносибатҳои дипломатии Душанбе бо Толибон каме нармтар шудааст, вале ҳанӯз ҳамлаҳо аз марзи Афғонистон ба сӯи Тоҷикистон сурат мегирад, ки ин ҳамлаҳо Тоҷикистонро сахт нигарон кардааст.
