Дирӯз, 13-уми апрел Сироҷиддин Муҳриддин, вазири корҳои хориҷии Тоҷикистон бо ҳамтои қирғизаш Руслан Казакбоев дар пасманзари даргирӣ дар марз, суҳбати телефонӣ анҷом дод. Дар ин бора Вазорати корҳои хориҷии Тоҷикистон хабар медиҳад.
Дар ин суҳбат раҳбарони вазоратҳои хориҷӣ ҳодисаи рӯзи 12-уми апрел дар Хистеварзи ноҳияи Бобоҷони Ғафурови вилояти Суғдро, ки дар натиҷаи он як сарбози тоҷик ҷон бохта буд, баррасӣ кардаанд.
Сироҷиддин Муҳриддин амали марзбонони қирғизро маҳкум карда, талаб кардааст, ки таҳқиқоти холисона гузаронида шавад ва гунаҳкорон ба ҷавобгарӣ кашида шаванд. Ҳамчунин ҷонибҳо ба тавофуқ расидаанд, ки бо якдигар тамосҳои доимӣ хоҳанд дошт.
Бино ба иттилои сомонаи Вазорати корҳои хориҷии Тоҷикистон, вазирон ба бар иломаваи ҳодисаи охири марзӣ, инчунин масъалаҳои омодагӣ ба ҷаласаи навбатии Шӯрои вазирони корҳои хориҷии ИДМ ва вохӯрии роҳбарони мақомоти корҳои хориҷии кишварҳои Осиёи Марказиро, ки қарор аст 13-уми майи соли ҷорӣ дар Душанбе баргузор шавад, баррасӣ кардаанд.
Ёдовар мешавем, ки шоми 12-уми апрел дар нуқтаи марзии ҷамоати Хистеварзи ноҳияи Бобоҷон Ғафуров бо деҳаи Борбодуки ноҳияи Лайлаки Қирғизистон байни марзбонон тирпарронӣ рух дода, Зоир Саидумаров, як марзбони 27-солаи тоҷик аз қафаси сина ҷароҳати вазнин бардошта, ҷон бохт.
