Дар натиҷаи садамаи чархболи тамғаи МИ-8 Нерӯҳои марзбонии Тоҷикистон, 1 нафар ба ҳалокат расида, 4 нафари дигар ҷароҳатҳои ҷисмонӣ бардоштаанд.
Ба иттилои Asia-plus, 4-уми августи соли ҷорӣ ин чархбол дар ҳайати 5 нафар барои наҷоти сайёҳони рус рафта буд.
Дар хабар омадааст, ки чархболи тамғаи МИ-8 тахминан соатҳои 12:10-и рӯзи 4 август аз хатсайри ҳавоӣ нопадид гашта, дар деҳаи Пои Мазори ҷамоати деҳоти Рованди ноҳияи Ванҷ-и ВМКБ, ҳангоми фурудоӣ дар пиряхи Хирсон, дараи Абдулқаҳор ба садама дучор шудааст.
Хабари суқути чархболи Нерӯҳои марзбонии Тоҷикистон дар ҳоле садо медиҳад, ки дар марзи Тоҷикистону Афғонистон, қисми амалии машқҳои муштараки неруҳои мусаллаҳи Русия, Узбекистон ва Тоҷикистон имрӯз оғоз шуд. Дар ин тамринҳо 2,5 ҳазор низомиёни се кишвар иштирок мекунанд.
